सामग्री खोज्नुहोस्

टोकियो । जङ्गली जनावरसँग मानव मुठभेडका घटना बढेपछि जापानको मन्त्रिपरिषद्ले शहरी क्षेत्रमा छिरेका भालुलाई आपतकालीन अवस्थामा गोली हान्न पाउने विधेयक अनुमोदन गरेको छ।  

सन् २०२४ को अप्रिलसम्मको एक वर्षमा भालुको आक्रमणबाट २१९ जना घाइते भएका थिए भने छ जनाले ज्यान गुमाएका थिए। जलवायु परिवर्तनका कारण भालुको प्राकृतिक आहारामा असर परेपछि उनीहरू बारम्बार शहर छिर्दै आक्रमण गर्ने क्रम बढेको छ।  

सरकारले संशोधित वन्यजन्तु संरक्षण तथा व्यवस्थापन कानून अन्तर्गत आपतकालीन अवस्थामा भालु मार्न अनुमति दिने व्यवस्था गरेको हो।

प्रशासनिक ढिलाइका कारण जङ्गली जनावरको आक्रमणबाट मानव जीवन जोखिममा परेको भन्दै व्यापक गुनासोपछि सरकारले यस्तो निर्णय लिएको हो।  

हालसम्म आवासीय क्षेत्रमा भालु वा बँदेलजस्ता जनावर मार्न निषेध थियो।

प्रहरीबाट अनुमति नपाएसम्म गोली हान्न नपाइने व्यवस्था थियो। नयाँ विधेयक आगामी महिनामा संसद्‌मा पेश गरी शरद ऋतुअघि नै लागू गरिने सरकारी अधिकारीहरूले बताएका छन्।

गत डिसेम्बरमा उत्तरी जापानको एक सुपरमार्केटमा भालुले दुई दिनसम्म आतंक मच्चाएको थियो। यस्तै, सन् २०२४ को अप्रिलसम्मको एक वर्षमा मात्र जापानमा नौ हजारभन्दा बढी भालु मारिएको तथ्यांक छ।