सामग्री खोज्नुहोस्

टोकियो । जापान सरकारले बढ्दो मूल्यवृद्धिको असर कम गर्न आपत्कालीन प्रयोगका लागि सुरक्षित राखिएको चामलको भण्डार जारी गर्ने घोषणा गरेको छ।  

सरकारले यसअघि ठूला भूकम्प जस्ता आपत्कालीन अवस्थामा मात्र चामल भण्डार प्रयोग गरेको थियो। तर, वितरणमा अवरोध आएपछि यस्तो निर्णय लिइएको यो पहिलो पटक हो।  

सन् २०२३ मा अत्यधिक गर्मीका कारण चामल उत्पादनमा कमी आएपछि माग बढेको थियो, जसका कारण मूल्य निरन्तर उकालो लागेको हो।

जलवायु परिवर्तनका कारण अत्यधिक गर्मी लहरले जापानलाई समेत प्रभावित पार्दै आएको छ।  

कृषिमन्त्री टाकु इटोका अनुसार सरकारको १० लाख टन आपत्कालीन भण्डारबाट २ लाख १० हजार टन चामल जारी गरिनेछ। उनले वितरण प्रणालीलाई स्थिर बनाउने उद्देश्यले सरकारले यो कदम चालेको बताए।  

सरकारले शरद ऋतुमा नयाँ फसल भित्रिएपछि मूल्य स्थिर हुने आशा गरेको थियो, तर वृद्धि जारी रहेपछि आपत्कालीन भण्डार प्रयोग गर्ने निर्णय गरिएको हो।