सामग्री खोज्नुहोस्

एजेन्सी । मालीका सैनिक र रुसको वाग्नर भाडाका सैनिकको सुरक्षामा रहेको गाडीहरूको एक समूहमाथि भएको सन्दिग्ध जिहादी आक्रमणमा परी मालीको उत्तरी क्षेत्रमा ३२ जनाको मृत्यु भएको अधिकारीहरूले शनिबार बताएका छन् ।

उत्तरी शहर गाओ र एन्सोन्गोबीच शुक्रबार उक्त आक्रमण भएको प्रहरीले जनाएको छ ।

शुरूमा १० जनाको मृत्यु भएको भनिए पनि केही समयपछि मृतक सङ्ख्या ३२ पुगेको जानकारी मालीका सुरक्षा अधिकारीले जनाएका छन् । ​

गाओस्थित एक अस्पताल स्रोतले भन्यो, ‘घटनास्थलबाट हामीकहाँ ३० भन्दा बढी मृत शरीर आएका छन् ।’ 

नाम नबताउने सर्तमा एक स्थानीय अधिकारीले एएफपीसँग भने, ‘जिहादीहरूले मालीका सैनिक र वाग्नर भाडाका सैनिकहरूको सुरक्षामा रहेको नागरिक काफिलामाथि आक्रमण गरेका थिए।’

उनले भने, ‘मृत्यु हुनेहरूमा सर्वसाधारण र सैनिकहरू पनि छन्।’

एक मेडिकल स्रोतका अनुसार मृतक र घाइतेमध्ये धेरैलाई उत्तरी मालीको मुख्य शहर गाओमा सारिएको छ ।