सामग्री खोज्नुहोस्

एजेन्सी । गैरआवासीय नेपाली व्यवसायी र समाजसेवी सुजन कटुवाल २०२५ का लागि बेलायतका सय प्रभावशाली व्यक्तिहरूमा समावेश भएका छन्।

बेलायतको अवार्ड इन्टेलिजेन्सले प्रत्येक वर्ष चयन गर्ने यस सूचीमा कटुवाललाई सामाजिक सेवामा उल्लेखनीय योगदानका लागि स्थान दिइएको हो।

कटुवालले अहिलेसम्म दुई लाख ५० हजारभन्दा बढी घरबारविहीनलाई खाना खुवाएका छन्। साथै, उनले पूर्वबेलायती सैनिकहरूको मानसिक स्वास्थ्य सेवा सहयोगार्थ ६ हजार माइलको पैदल यात्रा गरेका छन्। यो मानवीय सेवाका कारण उनलाई सूचीमा समेटिएको हो। 

यो सूचीमा समाजसेवी, सरकारी अधिकारी, प्रोफेसर, चिकित्सकजस्ता विभिन्न क्षेत्रका प्रतिष्ठित व्यक्तिहरू छन्।  

कटुवाल लन्डनको पानस गोर्खा रेस्टुरेन्टका सञ्चालक हुन्। साथै, उनले परोपकारी संस्था कम्ब्याट स्ट्रेसको सहयोगार्थ दुईपटक ६ हजार माइल पैदल यात्रा गरेका छन्। यो संस्थाले पूर्वसैनिकहरूलाई मानसिक स्वास्थ्य सेवा दिन्छ।  

कोरोना महामारीका बेला उनले संकटमा परेकालाई निःशुल्क खाना उपलब्ध गराए। कटुवालले सञ्चालन गरेको पानस हेल्पिङ ह्यान्डस् च्यारिटीमार्फत एक लाखभन्दा बढी स्वास्थ्यकर्मी र घरविहीनलाई खाना खुवाएका थिए। यसका लागि उनलाई सिटी अफ लन्डनबाट फ्रिडम अफ द सिटी अफ लन्डन अवार्ड प्रदान गरिएको थियो।  

नेपालको विराटनगरमा जन्मिएका कटुवाल सन् १९९८ मा बेलायत गएका थिए। उनका योगदानका लागि प्वाइन्ट्स अफ लाइट अवार्ड पनि प्रदान गरिएको छ।