सामग्री खोज्नुहोस्

एजेन्सी । दक्षिण–पश्चिम चीनको स्वायत्त क्षेत्र तिब्बतको डिङ्ग्री काउन्टीमा मङ्गलबार बिहानको ७ म्याग्निच्युडको भूकम्पमा परी मृत्यु हुनेको संख्या १२६ पुगेको छ । अन्य १८८ जना घाइते भएका छन् ।

भूकम्प प्रभावित क्षेत्रमा दूरसञ्चार, सडक र बिजुली सेवा पुनःस्थापना गरिएको छ ।​

भूकम्पपछि बुधबार दिउँसोसम्म कुल ६४६ पराकम्पनहरू गएका क्षेत्रीय सरकारले जनाएको छ ।

क्षेत्रीय आपत्कालीन व्यवस्थापन विभागका प्रमुख होङ लीका अनुसार सबैभन्दा ठूलो पराकम्पनको म्याग्निच्युड ४.४ थियो र यो केन्द्रविन्दुबाट करिब १८ किलोमिटर टाढा थियो ।​

चाइनिज रेड क्रस सोसाइटी (आरसीएससी)ले मङ्गलबार राति भूकम्प प्रभावित क्षेत्रहरूमा दोस्रो चरणको राहत सामग्री पठाएको छ । यसमा कपडाको पाल, सिरक र फोल्डिङ बेड लगायत चार हजार तीन सय वस्तुहरू समावेश छन् ।​​

आरसीएससीद्वारा आपत्कालीन सरसफाइ शौचालय, खाना पकाउने गाडी र क्याम्पर गाडीलगायत अन्य आपत्कालीन प्रतिक्रिया सामग्रीहरूसहित ५० भन्दा बढी उद्धारकर्मीहरू पनि प्रभावित क्षेत्रमा पठाइएका छन् ।