सामग्री खोज्नुहोस्

एजेन्सी । अमेरिकी विदेशमन्त्री एन्टोनी ब्लिन्कन जनवरी ४ देखि ९ सम्म दक्षिण कोरिया, जापान र फ्रान्सको भ्रमणमा जाने भएका छन्।

अमेरिकी विदेश विभागले शुक्रबार जारी गरेको विज्ञप्तिमा उक्त जानकारी दिएको हो।  

दक्षिण कोरियामा राजनीतिक संकटको बीच ब्लिन्कनले त्यहाँका वरिष्ठ सरकारी अधिकारीहरूसँग भेटवार्ता गर्नेछन्। भेटमा स्वतन्त्र, खुला, र समृद्ध हिन्द-प्रशान्त क्षेत्र प्रवर्द्धन गर्नका लागि द्विपक्षीय र जापानसँगको त्रिपक्षीय सहकार्यबारे छलफल हुने रोयटर्सले जनाएको छ ।

दक्षिण कोरियामा राष्ट्रपति युन सुक योलको महाभियोगपछि सिर्जित राजनीतिक संकट जारी छ।

शुक्रबार राष्ट्रपतीय सुरक्षा बल र सेनाले युनलाई पक्राउ गर्न खोजिरहेका अधिकारीहरूलाई रोक्ने प्रयास गरेका थिए। युनमाथि सन् २०२४ डिसेम्बर ३ मा मार्शल ल ठोक्न आदेश दिएर बिद्रोहको प्रयास गरेको आरोपमा अनुसन्धान भइरहेको छ।  ​

ब्लिन्कनको भ्रमणले क्षेत्रीय स्थायित्व र सहकार्यलाई थप बल पुर्‍याउने विश्वास गरिएको छ।