सामग्री खोज्नुहोस्

एजेन्सी । दक्षिण कोरियामा १८१ जना सवार एउटा विमान विमानस्थलमा दुर्घटना हुँदा कम्तीमा ४७ जनाको मृत्यु भएको छ ।

उक्त विमान रन वेबाट उछिट्टिएर दुर्घटनामा परेको स्थानीय समाचार संस्था योन्हापलाई उद्धृत गर्दै बीबीसीले जनाएको छ ।

विमान उछिट्टिएर देशको दक्षिण पश्चिममा पर्ने मुआन अन्तर्राष्ट्रिय विमानस्थलको पर्खालमा ठोक्किएको थियो।

जिजु एअरको उक्त विमानमा १७५ जना यात्रु र ६ जना चालक दलका सदस्य थिए । विमान थाइल्यान्डको ब्याङ्ककबाट फर्किरहेको जनाइएको छ ।

केही व्यक्तिको जीवितै उद्धार गरिएको छ र उद्धार प्रयासहरू जारी रहेको एक जना अग्नि नियन्त्रकले जनाएका छन् ।

एक जना विमानस्थलका अधिकारीले विमानको पछिल्लो भागबाट मानिसहरूलाई उद्धार गर्ने प्रयास भइरहेको जनाएका छन्।

सो विमानमा १७३ जना दक्षिण कोरियाका नागरिक र दुई जना थाई नागरिकहरू रहेका योन्हापले जनाएको छ।

दुर्घटनाको कारण खुलेको छैन तर स्थानीय सञ्चारमाध्यमहरूले विमानको प्रणालीमा चराले क्षति पुर्‍याउँदा यस्तो भएको हुनसक्ने विवरणहरू प्रकाशित गरिरहेका छन्। 

यो दुर्घटना पछिल्लो दशकमा दक्षिण कोरियामा भएको सबैभन्दा ठूलो विमान दुर्घटनामध्ये एक हो। पीडित परिवारप्रति सहानुभूति व्यक्त गर्दै सरकारलाई पूर्ण पारदर्शिता अपनाउन दबाब बढेको छ।