सामग्री खोज्नुहोस्

एजेन्सी । फ्रान्समा एक रेल चालकले ड्युटीमा रहेकै बेला आत्महत्या गरेका छन् । उनको आत्महत्यापछि रेल यातायातमा व्यापक ढिलाइ भएको फ्रान्सको रेल सञ्चालक एसएनसीएफले जनाएको छ ।

मङ्गलबारदेखि बुधबारसम्म फैलिएको पेरिस र दक्षिणपूर्वी फ्रान्सबीचको रेल सेवामा ढिलाइका कारण करिब तीन हजार यात्रु प्रभावित भएका छन् । 

यात्राका लागि असाधारण रूपमा व्यस्त समय क्रिसमसको पूर्वसन्ध्यामा आत्महत्या गरेपछि मङ्गलबार करिब १० वटा उच्च गतिको (टीजीभी) रेलहरू पाँच घन्टासम्म ढिलाइ भएका थिए । 

पेरिसको दक्षिणपूर्वमा रहेको मेलुनस्थित अभियोजकको कार्यालयले चालकले चलिरहेको रेलबाट उफ्रेर आत्महत्या गरेको देखिएको बताएको छ । उनको शव पछि रेलमार्ग नजिकै फेला परेको थियो ।

कार्यालयका अनुसार चालकबिना नियन्त्रणमा रहेको रेलको स्वचालित आपत्कालीन प्रक्रिया सक्रिय भएकाले रेल रोकियो ।​

एसएनसीएफले चालकको मृत्युको पुष्टि गर्दै उनले ‘रेल चल्दै गर्दा आत्महत्या गरेको’ बताएको छ ।