सामग्री खोज्नुहोस्

काठमाडौं । नेपाल प्रिमियर लिग (एनपीएल)को फाइनल खेल शनिबार हुँदैछ । उपाधिका लागि सुदूरपश्चिम रोयल्स र जनकपुर बोल्ट्सबीच प्रतिस्पर्धा गर्दैछन् ।​​​

एनपीएलको फाइनल खेल त्रिवि क्रिकेट मैदान कीर्तिपुरमा मध्यान्ह साढे १२ बजे शुरू हुनेछ । दुवै टोली उपाधि हात पार्ने लक्ष्यसहित मैदानमा उत्रिने तयारीमा छन् ।

सुदूरपश्चिम रोयल्सको कप्तानमा दीपेन्द्रसिंह ऐरीले मैदानमा शतप्रतिशत योगदान दिने बताएका छन् ।

फाइनल खेलको पूर्वसन्ध्यामा आयोजित पत्रकार सम्मेलनमा कप्तान ऐरीले फाइनल खेलका लागि कुनै विशेष योजना नभएको बताए ।

यस्तै, जनकपुर बोल्ट्सका कप्तान आशिफ शेखले फाइनल खेलमा राम्रो प्रदर्शन गर्ने बताएका छन् । ‘आफूसँग जे जति छ, त्यो मैदानमा दिने छौं । फाइनल खेलको नतिजाका बारेमा अहिले नै सोचेका छैनौं तर उत्कृष्ट प्रदर्शन गर्नेछौं,’ उनले भने । 

एनपीएलमा शानदार प्रदर्शन गरिरहेको सुदूरपश्चिमले ८ खेलमा एक खेलमा मात्र हार व्यहोरेको छ । 

लिग चरण र क्वालिफायर गरेर सुदूरपश्चिमले दुईपटक जनकपुरलाई पराजित गरिसकेको छ ।