सामग्री खोज्नुहोस्

एजेन्सी । क्रोएसियाको राजधानी जाग्रेबस्थित एक विद्यालयमा शुक्रबार भएको चक्कु आक्रमणमा सात वर्षीया बालिकाको मृत्यु भएको छ ।

एक शिक्षकसहित अन्य ६ विद्यार्थी घाइते भएको प्रहरीले जनाएको छ । 

प्रहरीका अनुसार आक्रमण स्थानीय समयानुसार बिहान ९ः५० बजे प्रेच्को एलिमेन्टरी स्कूलमा भएको हो ।

उनीहरूले आक्रमणकारीलाई ‘युवा पुरुष’ भनी वर्णन गर्नुका साथै उनलाई पक्राउ गरिएको बताएका छन् ।

स्वास्थ्यमन्त्री इरेना ह्रिस्टिकले आक्रमणकारी १८ वर्षभन्दा माथिको भएको बताए । यद्यपि मिडियाले उनी १९ वर्षका भएको बताएको छ । ​

क्रोएसियाली मिडियाले प्रकाशित गरेको भिडियो फुटेजमा बालबालिकाहरू स्कूलको भवनबाट भागेको र मेडिकल हेलिकप्टर स्कूलको आँगनमा अवतरण गरेको देखाइएको छ । 

प्रधानमन्त्री आन्द्रेज प्लेन्कोभिकले सरकारी बैठकको शुरूवातमा आक्रमणबाट ‘स्तब्ध’ भएको बताउँदै अधिकारीहरूले अझै के भयो भनेर पत्ता लगाउन काम गरिरहेको जानकारी दिए ।

उनले धेरै बालबालिकालाई जाग्रेबको विभिन्न अस्पतालमा लगिएको बताए ।