सामग्री खोज्नुहोस्

काठमाडौं । नेपाल प्रिमियर लिग (एनपीएल)को चौथो दिन २ खेल भएका छन् । 

बुधबारको पहिलो खेलमा काठमाडौं गुर्खाजले कर्णाली याक्सलाई ३ विकेटले पराजित गरेको छ । ​

टस हारेर पहिला ब्याटिङ गरेको कर्णालीले निर्धारित २० ओभरको खेलमा ५ विकेट गुमाएर १ सय ४९ रनको योगफल बनायो ।

१ सय ५० रनको विजयी लक्ष्य काठमाडौंले १९ दशमलव ३ ओभरमा सात विकेट गुमाएर पूरा गर्‍यो ।

काठमाडौं गुर्खाजका लागि सुमित महर्जनले अविजित ४० रन बनाए । उनले ३७ बल खेल्दै ३ चौका र १ छक्का हाने ।

यस्तै जेरार्ड एरास्मसले २८ बलमा ३८ रनको योगदान दिए । यसमा उनको ३ चौका र २ छक्का सामेल थिए । यस्तै कप्तान करण केसीले १० बलमा २ छक्का र २ चौकाको मद्दतमा २८ रन बनाए । यसैगरी माइकल लेभिटले १९ बल खेल्दै २ चौका र १ चौकासहित २२ रन बनाए । 

बलिङतर्फ कर्णाली याक्सका लागि सोमपाल कामी, नन्दन यादव, गुल्सन झा, जिशन मक्सुद र विपिन शर्माले १/१ विकेट लिए । 

यसअघि कर्णाली याक्सका लागि १ सय ४९ रनको योगफल बनाउने क्रममा शिखर धवनले अर्धशतकीय पारी खेले । उनले ५१ बलमा चार चौका र पाँच छक्काको मद्दतमा अविजित ७२ रनको योगदान दिए ।

यसैगरी चाल्डिक वाल्टनले १५ बलमा पाँच चौकाको सहयोगमा २१, बाबर हायातले १८ बलमा १३ रन, गुलसन झाले १९ बलमा १ चौकाको मद्दतमा १२ तथा जिशन मक्सुदले ११ बल खेल्दै १ चौकाको सहयोगमा १४ रन बनाए ।  

बलिङतर्फ काठमाडौंका लागि जेहार्ड एरास्मसले २ तथा नाथन स्वटर, दीपेश कँडेल र कप्तान करण केसीले १/१ विकेट लिए ।

यस्तै, बुधबार नै भएको दोस्रो खेलमा विराटनगर किङ्ग्सले लुम्बिनी लायन्सलाई २ विकेटले पराजित गरेको छ । 

लुम्बिनी लायन्सले जीतका लागि दिएको १ सय ९२ रनको लक्ष्य विराटनगरले १९ दशमलव ५ ओभरमा ८ विकेटको क्षतिमा पूरा गर्‍यो ।

विराटनगरको जीतमा लोकेश बमले अर्धशतकीय पारी खेले । उनले ४७ बलमा ६ छक्का र ३ चौका प्रहार गर्दै सर्वाधिक ७१ रन बनाए । यस्तै, बसिर अहमदले ४०, मार्टिन गुप्टिलले २८, क्रिस सोलले १४ र दीपक बोहोराले नौ रनको योगदान दिए । 

बलिङतर्फ लुम्बिनीका लागि दुर्गेश गुप्ताले सर्वाधिक ३ विकेट लिए । यस्तै, रामोन सिमन्ड्स र सादबिन जफरले २/२ तथा विवेक यादवले १ विकेट लिए । 

त्यसअघि, टस हारेर ब्याटिङ गरेको लुम्बिनीले निर्धारित २० ओभरमा सात विकेट गुमाएर १ सय ९१ रन बनाएको थियो ।

लुम्बिनीका लागि कप्तान रोहितकुमार पौडेलले सर्वाधिक ४६ रन बनाए । उनले २९ बलमा २ छक्का र चार चौका प्रहार गरे । यस्तै, टम मूर्सले ३०, विवेक यादवले १९, अर्जुन साउदले १७, आशुतोष घिरैया र सादबिन जफरले समान १५/१५ तथा सन्दीप जोराले १२ रन बनाए । लुम्बिनीले अतिरिक्त २९ रन पाएको थियो ।  

बलिङतर्फ विराटनगरका लागि कप्तान सन्दीप लामिछाने, इस्मत आलम र राजेश पुलामीले १  विकेट लिए ।