सामग्री खोज्नुहोस्

काठमाडौं । नेपाल प्रिमियर लिग (एनपिएल) अन्तर्गत सोमबार भएका दुई छुट्टाछुट्टै खेलमा चितवन राइनोज र जनकपुर बोल्ट्स विजयी भएका छन् ।

त्रिवि क्रिकेट मैदानमा भएको खेलमा चितवन राइनोजले काठमाडौं गुर्खाजलाई पाँच विकेटले पराजित गरेको हो ।

काठमाडौंले जीतका लागि प्रस्तुत गरेको १ सय १२ रनको लक्ष्य चितवनले १७ दशमलव एक ओभरमा पाँच विकेट गुमाएर पूरा गर्‍यो ।

चितवनका लागि सन्तोष कार्कीले सर्वाधिक २८ रन बनाए । उनले ३१ बल खेल्ने क्रममा दुई चौका र एक छक्का प्रहार गरे ।

यस्तै लुक बेन्केनस्टाइनले २२, हसन इशाखिलले १२, कप्तान कुशल मल्लले ११ र रवि बोपराले ११ तथा शरद भेषवाकरले अविजित ११ रन बनाए । 

यस्तै दोस्रो खेलमा कप्तान अनिलकुमार साहको अर्धशतकीय पारीको मद्दतमा जनकपुर बोल्ट्सले कर्णाली याक्सलाई आठ विकेटले पराजित गरेको हो । जनकपुर बोल्ट्स आफ्नो दोस्रो खेलमा लगातार विजयी भएको हो । 

यसअघि शनिबार सम्पन्न पहिलो खेलमा जनकपुर बोल्ट्स विराटनगर किङ्ग्ससित आठ विकेटले नै विजयी भएको थियो ।

जीतसँगै जनकपुर बोल्ट्स अङ्क तालिकाको शीर्ष स्थानमा रहेको छ ।

टस जितेर पहिला ब्याटिङ गरेको कर्णाली याक्सले निर्धारित २० ओभरको खेलमा सात विकेट गुमाउँदै एक सय ४१ रन बनायो ।

एक सय ४२ रनको विजयी लक्ष्य जनकपुर बोल्ट्सले १५ दशमलव एक ओभरमा मात्र दुई विकेट गुमाएर पूरा गर्‍यो । जनकपुर बोल्ट्सका लागि कप्तान अनिलकुमार साहले अविजित ६२ रन बनाए ।

उनले ४२ बल खेल्ने क्रममा तीन छक्का र छ चौका प्रहार गरे ।