सामग्री खोज्नुहोस्

टोकियो । जापानमा ‘नेपाली हाउस’ निर्माणार्थ सहयोग जुटाउने उद्देश्यले ‘ १४ औँ नेपाल फेस्टिवल’को आयोजना हुने भएको छ । जापानमा नेपाल र नेपालीको पहिचान झल्कने नेपाली हाउस नामक बहु सांस्कृतिक केन्द्रको निर्माण यस वर्षको नेपाल फेस्टिवलको मुख्य उद्देश्य रहेको आयोजक गैरआवसीय नेपाली संघ (एनआरएनए) जापानले जनाएको छ ।

आगामी नोभेम्बर ३० र डिसेम्बर १ तारिक टोकियोको नाकानो सिकिनोमोरी पार्कमा हुने फेस्टिवलको आयोजकमा एनआरएनए जापानसहित नेपाली दुतावास टोकियो र नेपाल आदिवासी जनजाती महासंघ जापान रहेका छन् ।

फेस्टिवलमा सिंगो नेपाल चिनाउने उद्देश्यले फोटो तथा डकुमेन्ट्री प्रर्दशन गरिने एनआरएनए जापानका अध्यक्ष नविन निउरेले बताए । नेपाल सरकार संस्कृति पर्यटन तथा नागरिक उड्डयन मन्त्रालयको सहयोग तथा नेपाल पर्यटन बोर्डसँगको सहकार्यमा फोटो तथा डकुमेन्ट्री प्रर्दशनको तयारी गरिएको एनआरएनएले जनाएको छ ।

‘फोटो तथा भिडियो प्रर्दशर्नी मार्फत् विश्वको सर्वोच्च शिखर सगरमाथा, भगवान गौतम बुद्धको जन्मभूमि नेपाल भनेर जापानीज नागरिकलाई नेपाल चिनाउने प्रयास गर्ने छौँ । जसले देशको पर्यटन प्रवद्र्धनमा समेत सहयोग पुग्छ’ निउरेले भने । एनआरएनए जापानले प्रत्येक वर्ष आयोजना गर्दै आएको नेपाल फेस्टिवलमा नेपाली, जापानीसहित विभिन्न देशका नागरिकको सहभागिता रहँदै आएको छ ।

फेस्टिवलको आर्कषण नेपालको हिमालदेखि तराईसम्मका विभिन्न जातजातीको भेषभुषासहित झाँकी प्रस्तुती, लोक भजन, पञ्चेबाजाको प्रस्तुति रहने जनाइएको छ । साथै नेपालको परम्परा, धर्म र संस्कृति झल्कने घरको निर्माण गर्ने अध्यक्ष निउरेले बताए ।

फेस्टिवलमा ४० वटा व्यापारीक स्टल रहने छन् । जसमा १२ वटा नेपाली खानाको र अन्य व्यापपारीक तथा आयोजकको प्रयोजिनका लागि रहने छन् । फेस्टिवल तयारीको अन्तिम चरणमा रहेको एनआरएनए जापानले जनाएको छ । फेस्टिवलमा नेपाली खाना, नेपाली कपडा र अन्य नेपाली उत्पादनको कारोबार हुने छ ।

फेस्टिवलको अनुमानित खर्च १ करोड ४० लाख येन रहेको एनआरएनए जापानका प्रवक्ता खगराज गौतमले जानकारी दिए । फेस्टिवलमा दिपओए फाउन्डेसन जापान, पूर्ण ट्रेडीङ, एनआरएनए आईसीसीका उपाध्यक्ष रोबिन शेरचन, व्यवसायी राजन भट्टराई, पे एनपिएल नाकम क्रेडिट कार्डले मुख्य आर्थिक सहयोग गरेको एनआरएनए जापानले बताएको छ ।

गैरआवसिय नेपाली संघ एनआरएन जापानले सन् २०१२ देखि जापानमा नेपाल फेस्टिवलको गर्दै आएको छ ।