सामग्री खोज्नुहोस्

टोकियो । गैर आवासीय नेपाली संघ चिबा छेत्रीय समिती जापान र माचुदो नगरको संयुक्त आयोजनमा सम्पन्न भएको माचुदो नेपाल फेस्टिवल चिबाको आय- ब्यय विवरण सार्वजनिक गरिएको छ ।

गत सेप्टेम्बर २२ तारिख आयोजना गरिएको सो फेस्टिवलको आय ब्यय विवरण आईतवार चिबामा एक कार्यक्रमको आयोजना गरी सार्वजनिक गरिएको हो ।

आर्थिक समितिका संयोजक मुक्तिराज रेग्मीले सार्वजनिक गरेको आर्थिक प्रतिबेदन अनुसार सो फेस्टिवलमा ८६ लाख ७९ हजार ८४१ एन आम्दानी भएको छ ।

नेपाल र जापानबीचको ’कल्चर एक्सेन्च’ गर्ने उद्देश्यले आयोजना गरिएको उक्त फेस्टिवलमा ५६ लाख ३८ हजार २४५ एन खर्च भएको आईतवार सार्वजनिक गरिएको आर्थिक प्रतिबेदनमा उल्लेख गरिएको छ ।

आयोजकका अनुसार उक्त फेस्टिवलबाट ३० लाख ४१ हजार ५९६ एन खुद नाफा भएको र त्यसमध्य ५ लाख २० हजार एन उठ्न बाँकी रहेको छ ।

‘केही रकम अझै उठ्न बाँकी छ, त्यो हामी उठाउछौ’ आर्थिक प्रतिबेदन सार्वजनिक गर्दै आर्थिक संयोजक रेग्मीले भने ’फेस्टिवल सफल पार्न आर्थिक सहयोग गर्ने सबैलाई धन्यवाद ब्यक्त गर्न चाहन्छौ ।’

आफुहरुले सुरुमा ७० प्रतिशत नेपाली र ३० प्रतिशत जापानीज कल्चर प्रस्तुत गर्ने उद्देश्य राखेता पनि पछी ५०/५० प्रस्तुत गर्न सफल भएको सास्कृतिक बिभागका संयोजक रामकृष्ण बम मल्लले जानकारी दिए ।

क्षेत्रिय समितिले सफलतापूर्वक फेस्टिवल सम्पन्न गर्नु आफुहरुका लागि खुशीको कुरा भएको बताउदै गैर आवासीय नेपाली संघका केन्द्रिय उपाध्यक्ष रोबिन शेरचनले यस्ता कार्यक्रमलाई निरन्तरता दिनु पर्नेमा जोड दिए ।

चिबा क्षेत्रिय समितिका संयोजक समिर खड्काको अध्यक्षता सम्म्पन्न भएको उक्त कार्यक्रममा गैर आवासीय नेपाली संघ जापानका अध्यक्ष नबिन नियुरे, उपाध्यक्ष सुवास लामिछाने, चिबा क्षेत्रिय समितिका सल्लाहकार राजन भट्टराई, सल्लाहकार भुपीगोबिन्द श्रेष्ठ, मुल आयोजक समितिका संयोजक राजनबाबु सुबेदी, पत्रकार महासंघ जापान शाखाका सदस्य फुर्बा शेर्पा, चिबा क्षेत्रिय समितिका संस्थापक संयोजक विश्व सुबेदी लगायतले फेस्टिवलबाट भएको मुनाफालाई सही सदुपयोग गर्नुपर्नेमा जोड दिएका थिए ।

उप-संयोजक शंकर सुबेदीले स्वागत गरेको कार्यक्रमको सन्चालन सचिब मोहन कार्कीले गरेका थिए ।