सामग्री खोज्नुहोस्

एजेन्सी । श्रीलङ्काली प्रहरीले अनलाइन ठगीमा अन्तर्राष्ट्रिय बैंकहरूलाई लक्षित गरेको आरोपमा २ सय ३० भन्दा बढी चिनियाँलाई पक्राउ गरेको छ ।

यस कार्यमा बेइजिङबाट पठाइएका सुरक्षा अधिकारीहरूको सहयोग रहेको विदेशमन्त्री विजिता हेराथले मङ्गलबार जानकारी दिएका हुन् ।

विदेशमन्त्री हेराथले गत साता गरिएको प्रहरी छापामा कथित ठगीमा प्रयोग गरिएका २ सय ५० कम्प्युटर र पाँच सय मोबाइल फोन पनि जफत गरिएको बताए ।

उनले कति रकम चोरी भएको थियो भन्नेबारे अनुसन्धान जारी रहेको बताए ।

‘उनीहरूले विशेषगरी विदेशी बैंक र वित्तीय संस्थाहरूलाई लक्षित गरेका छन्’, हेराथले छापामा लक्षित गिरोहहरूका बारेमा भने । ​​

कोलम्बोस्थित चिनियाँ दूतावासले श्रीलङ्काली प्रहरीसँग ‘विशेष अभियान’ सञ्चालन गर्न सुरक्षा अधिकारीहरूको एउटा ‘कार्य समूह’ पठाएको थियो ।

‘ठूलो सङ्ख्यामा आपराधिक संदिग्धहरू पक्राउ परेका छन्’, दूतावासले वक्तव्यमार्फत भनेको छ, ‘स्वदेश फिर्ता र अन्य कामहरू जारी छन् ।’

शनिबार भएको छापामा प्रहरीले एक सय २६ चिनियाँ पुरुषका साथै दुई भियतनामी, एक थाई र एक फिलिपिनोलाई पक्राउ गरिएको थियो ।