सामग्री खोज्नुहोस्

एजेन्सी । ट्युनिसियाको पूर्वी तटमा १३ जना अफ्रिकी आप्रवासीको शव फेला परेको छ ।

मङ्गलबार र बुधबार देशको तटीय शहर सलक्ता र चेब्बाबाट शव फेला परेको मोनास्टिर र महदिया प्रान्तका सार्वजनिक अभियोजनका प्रवक्ता फरीद बेन झाले जानकारी दिएका छन् ।

उनका अनुसार अनुसन्धान शुरू गरिएको र थप विवरण प्राप्त हुन बाँकी छ ।​

ट्युनिसिया र छिमेकी देश लिबिया युरोपमा राम्रो जीवन प्राप्त गर्ने आशामा अन्य देशबाट आएका आप्रवासीहरूको खतरनाक भूमध्य सागरको जोखिमपूर्ण यात्राको प्रमुख प्रस्थान विन्दु बनेका छन् ।  ​

ट्युनिसियाको तटबाट जनवरी १ देखि कम्तीमा एक सय ३ अस्थायी डुङ्गाहरू पल्टिएका छन् र ३ सय ४१ शवहरू बरामद गरिएको आन्तरिक मन्त्रालयले जनाएको छ । 

ट्युनिसियाली एफटिडिइएस’ अधिकार समूहका अनुसार गत वर्ष उत्तर अफ्रिकी देशमा जहाज दुर्घटना हुँदा १३ सयभन्दा बढी मानिसको मृत्यु वा बेपत्ता भएका थिए ।