सामग्री खोज्नुहोस्

टोकियो। ताइफु ७ नम्बर नाम दिइएको हुण्डरीका कारण जापानभरको जनजीवन बिहानै देखि प्रभावित भएको छ।

जापानका संचार माध्यमहरुले प्रकाशन गरेको समाचार अनुसार ताइफुको प्रभावका कारण राजधानी टोकियो देखि किनकी क्षेत्रको ओसाका लगायत र तोउहोकु क्षेत्रमा पर्ने हिरोसिमा क्षेत्रमा चल्ने तीब्र गतिका ट्रेनहरु बिहानै देखि बन्द भएका छन्।

नागोया देखि ओसाका चल्ने नोजोमी लाइन भने १ घण्टामा २ ओटा मात्रै चलिरहेको जापानको सरकारी संचार संस्था एनएचकेले समाचारमा उल्लेख गरेको छ।

त्यसैगरी ताइफुकै कारण टोकियोको हानेदा र चिबाको नारिता विमानस्थलबाट छुट्ने राष्ट्रिय तथा अन्तराष्ट्रिय उडानहरु समेत प्रभावित भएका छन्।बिहान १० बजे सम्मको अपडेट अनुसार हानेदा र नारिता अन्तराष्ट्रिय विमानस्थलबाट उडान भर्ने र अवतरण गर्ने ३१९ उडानहरु रद्द गरिएको छ।

त्यस्तैगरी, जापानका विभिन्न क्षेत्र जोड्ने हाइवेहरु समेत बन्द भएको र कतिपय हाइवे सडकहरु बन्द हुने उच्च सम्भावना रहेको समाचारमा उल्लेख गरिएको छ। समाचारमा जनाइए अनुसार कान्तोउ क्षेत्रका हाइवे सडकहरु अबरुद्द हुने उच्च सम्भावना रहेकोछ।

अधिकारीहरुले ताइफुको सबै भन्दा धेरै प्रभाव चिबा प्रिफेक्चरमा पर्ने बताएका छन्। चिबा क्षेत्रमा चर्को हावा हुरी चल्नुका साथै भारी वर्षा समेत हुने भन्दै अनाबश्यक घर बाहिर ननिस्कन नागरिकलाइ आग्रह गरेका छन्।

चिबाका केही क्षेत्रमा बिद्युत आपूर्ति समेत बन्द भएको पनि समाचारमा उल्लेख गरिएको छ।