सामग्री खोज्नुहोस्

टोकियो । जापानको हिरोसिमा शहरमा भएको परमाणु बम आक्रमणको ७९औं वर्ष पूरा भएको​ छ । 

७९औं वार्षिकोत्सवको अवसरमा मंगलबार आयोजित कार्यक्रममा युक्रेन र गाजामा भएको युद्धले विश्वव्यापी रूपमा डर र अविश्वासलाई गहिरो बनाएको भन्दै चिन्ता व्यक्त गरिएको छ ।​

हिरोसिमाका मेयर काजुमी मात्सुईले सन् १९४५ अगस्ट ६ मा जापानी शहर हिरोसिमामा लगभग १ लाख ४० हजारको ज्यान जाने गरी भएको अमेरिकी परमाणु बम आक्रमण पीडितहरूको सम्झनामा आयोजित स्मृति कार्यक्रममा शोकपूर्ण भाषण दिएका थिए ।  

‘युक्रेनमा रुसको आक्रमण र इजरायल र प्यालेस्टाइनबीचको बिग्रँदै गएको अवस्थाले अनगिन्ती निर्दोष व्यक्तिको ज्यान लिइरहेको छ र सामान्य मानिसको जीवनलाई ध्वस्त पारेको छ’, उनले भने, ‘यी विश्वव्यापी त्रासदीले राष्ट्रहरूबीच अविश्वास र डरलाई गहिरो बनाइरहेका छन्, जसले अन्तर्राष्ट्रिय समस्या समाधान गर्न हामी सैन्य शक्तिमा भर पर्नुपर्छ भन्ने धारणालाई बलियो बनाउँछ ।’

सन् १९४५ मा हिरोसिमामा आक्रमण गरेको केही दिनपछि अमेरिकीले दक्षिणपश्चिम जापानको नागासाकीमा दोस्रो परमाणु बम प्रहार गरेको थियो जसमा करिब ७४ हजार मानिसको ज्यान गएको थियो ।