सामग्री खोज्नुहोस्

टोकियो । सेमिनारमा सहभागी गराउने भन्दै मोटो रकम लिएर मानिसहरुलाइ जापान लागेका बिषयमा केन्द्रिय अनुसन्धान ब्यूरोले अनुसन्धान गर्ने भएको छ ।

नक्कली कागजपत्र बनाएर दर्जनौ मानिसहरुलाइ अबैध रुपमा जापान ल्याएको बिषयमा क्योदाई न्यूजले समाचार प्रकाशन गरेपछि सिआइबीले आबश्यक विवरण पठाइदिन आग्रह गर्दै अनुसन्धान गर्ने बताएको हो।

‘मानव तस्कर जस्तो गम्भीर बिषयमा समाचार प्रकाशन भएकाले विवरणहरु उपलब्ध गराइदिनु भएमा हामी अनुसन्धान गर्छौ’ सिआइबिका प्रबक्ता होबिन्द्र बोगटीले क्योदाई संगको कुराकानीमा भने।

सिआइबिका प्रबक्ता बोगटीको आग्रहपछि क्योदाई न्यूजलाइ प्राप्त सम्पूर्ण बिवरणहरु सिआइबिलाइ पठाईसकेको छ।

गैर आवासीय नेपाली संघका अध्यक्ष नविन निउरे र उपाध्यक्ष सुवास लामिछानेलाइ स्पोन्सर गराएर तयार पारेको कागजपत्र बाहिरिए पछि यो बिषय संचार माध्यम मार्फत सार्बजनिक भएको थियो।

ति कागजपत्र समिर लामा नामका व्यक्तिले तयार गरेको एनआरएका पदाधिकारीहरुले जनाएका छन्। लामा ओसाकामा रहेको सूचना पाएसंगै बिहानै ओसाका पुगेका एनआरएनए जापानका अध्यक्ष निउरेले यो समाचार तयार पार्दा सम्म उनलाई भेटेका छैनन्।

एनआरएनएको आपत्ती

यसैबीच, गैर आवासीय नेपाली संघ जापानले एक बिज्ञप्ति प्रकाशित गर्दै सम्बन्धित व्यक्तिको अनुमति बेगर आफ्ना पदाधिकारीहरुको नाम प्रयोग गरिएकाप्रति गम्भीर आपत्ती जनाएको छ।

प्रबक्ता खगराज गौतमले एक बिज्ञप्ति जारी गर्दै संस्थाका पदाधिकारीको नाम अनाबश्यक प्रयोग गर्नुले मानव तस्करमा ठुलै गिरोहको संलग्नता रहेको आशंका पैदा भएको उल्लेख गरेका छन्।