सामग्री खोज्नुहोस्

काठमाडौं । कान्तिपुर मिडिया ग्रुपका अध्यक्ष कैलाश सिरोहिया पक्राउ परेका छन् ।

काठमाडौं उपत्यका अपराध अनुसन्धान कार्यालयका प्रहरी वरिष्ठ उपरीक्षक सानुराम भट्टराई र प्रहरी उपरीक्षक रवीन्द्र रेग्मीसहितको टोलीले अध्यक्ष सिरोहियालाई पब्लिकेसनको थापाथलीस्थित उनकै कार्यकक्षबाट मंगलबार पक्राउ गरेको हो ।

प्रहरी उपरीक्षक रेग्मीले अनुसन्धानका क्रममा अध्यक्ष सिरोहियालाई पक्राउ गरिएको जानकारी दिए । उनलाई मंगलबार नै थप अनुसन्धानका लागि जनकपुर लगिएको छ ।

पक्राउ परेपछि अध्यक्ष सिरोहियाले सञ्चारकर्मीहरुसँग आफूले छानबिनका लागि सघाउँछु भन्दाभन्दै कार्यकक्षबाट पक्राउ गरेका भन्दै आपत्ति जनाएका थिए ।

धनुषा जिल्ला अदालतका न्यायाधीश चित्रबहादुर गुरुङको इजलासले सिरोहियाविरूद्ध पक्राउ पुर्जी जारी गरेको थियो ।

सिरोहियाको नागरिकता नम्बर र अर्का एक व्यक्तिको नागरिकता नम्बर एउटै रहेको उल्लेख गर्दै जाहेरी परेपछि धनुषा प्रहरीले उनीविरूद्ध पुर्जी जारी गर्न माग गरेको थियो । सोही पुर्जीका आधारमा उनलाई प्रहरीले पक्राउ गरेको हो ।