सामग्री खोज्नुहोस्

​​काठमाडौं ।  प्रमुख प्रतिपक्षी दल नेपाली कांग्रेसको अवरोधपछि प्रतिनिधि सभाको बिहीबारको बैठक स्थगित भएको छ ।

बैठक प्रारम्भ हुनासाथ कांग्रेसका सांसदले रोष्टम घेराउ गर्दै विरोध जनाएपछि सभामुख देवराज घिमिरले बैठक स्थगित गरेका हुन् । साथै उनले अर्को बैठक शुक्रबार बिहान ११ बजे बस्ने जानकारी गराए ।

आजको बैठकमा प्रमुख प्रतिपक्षी दलको अवरोधविरुद्ध सत्तारुढ दल नेकपा एमाले पनि रोष्टममा उत्रिएको थियो ।

सभामुख घिमिरेले उपप्रधान तथा गृहमन्त्री रवि लामिछानेले बोल्नका लागि समय माग गरेको जानकारी गराउँदै समय दिएका थिए ।

गृहमन्त्री रोस्ट्रमतर्फ जान खोज्दा कांग्रेस सांसदहरूले रोक्न खोजेका थिए । त्यसैक्रममा पूर्वप्रधानमन्त्री एवं एमालेका अध्यक्ष केपी शर्मा ओली पनि उठेका थिए ।

लगत्तै कांग्रेस उपसभापति धनराज गुरुङले ओलीतर्फ हेरेर नाराबाजी गरे । त्यसपछि एमाले सांसदहरू पनि गुरुङलाई धकेल्न पुगेका थिए ।

नेपाली कांग्रेसले सहकारीको रकम अपचलनमा उपप्रधान एवं गृहमन्त्री लामिछानेको संलग्नता देखिएको आरोप लगाउँदै निष्पक्ष छानबिनका लागि संसदीय समिति गठनको माग गर्दै आएको छ ।