सामग्री खोज्नुहोस्

बागलुङ । माध्यमिक शिक्षा परीक्षा (एसईई)को तयारीमा रहेका बागलुङ बलेवाका विद्यार्थीलाई लक्षित गर्दै ‘मोटिवेशनल’ कक्षा सञ्चालन गरिएको छ ।

बागलुङ नगरपालिका, जैमिनी नगरपालिका र बरेङ गाउँपालिकासँगको सहकार्यमा गण्डकी प्रदेश सभा सदस्य डिल्लीराम सुवेदीको सचिवालयले गरेको कार्यक्रममा ७७९ विद्यार्थीलाई समेटिएको थियो ।

सचिवालयका अनुसार दक्षिणी बागलुङका ६ स्थानमा ‘मोटिवेशनल’ कार्यक्रम सञ्चालन गरेको थियो ।

शुक्रबार र शनिबार बलेवाको गणेश सामुदायिक अध्ययन केन्द्र, जैमिनीको कुसमिसेरा २ स्थान, संस्कृत मावि जैदी बेलबगर, बरेङ गाउँपालिकाको शारदा मावि बाटाकाचौर र सर्वोदय मावि हुग्दीशिर बरेङमा कार्यक्रम सञ्चालन गरिएको थियो ।

विषयगत शिक्षक र मनोपरामर्श कर्ताको सहजीकरणमा कार्यक्रम सञ्चालन गरिएको प्रदेश सभा सदस्य सुवेदीले जानकारी दिए । विद्यार्थीहरूलाई ‘मोटिवेशनल’ कक्षाका साथै विषयगत शिक्षकसँग अन्तर पाठ्यक्रमका बारेमा पनि जानकारी गराइएको उनले बताए ।

विद्यार्थीको मनोबल उच्च बनाउनका लागि कार्यक्रम गरिएको उनको भनाइ छ । ‘हामीले एसईई परीक्षालाई अलि फरक ढंगले हेर्छौं, परीक्षा भनेपछि जो कोहीलाई पनि तनाव हुन्छ’, प्रदेश सभा सदस्य सुवेदीले भने, ‘यही तनावलाई मुक्त गराउन कार्यक्रम सञ्चालन गरिएको हो । यसले विद्यार्थीलाई थप हौसला प्रदान गर्ने विश्वास लिएका छौं ।’

परीक्षाको तयारी, गणित तथा विज्ञानजस्ता विषयका सूत्रहरू कसरी सम्झने लगायतका विषयमा शिक्षकहरूले महत्त्वपूर्ण टिप्स दिएका उनले जानकारी दिए ।

कार्यक्रममा बलेवाका ५ विद्यालयका १८४, जैमिनी बेलबगरका १२९, कुसमिसेराका २५३, बरेङ शारदा माविका ७३ र सर्वोदय माविका १४० जना विद्यार्थी सहभागी थिए ।

कार्यक्रममा मनोपरामर्शका प्राध्यापक प्रदीप सुवेदी, सुमन शर्मा, पाठ्यक्रम विषय विशेषज्ञहरू पुनदरी फुयाँल, रोशन आचार्य, उमेश श्रेष्ठ, लयप्रसाद सापकोटा, युवराज पौडेल, सन्तोष पौडेल, शंकर शर्मालगायतका विषयगत शिक्षकहरूले सहजीकरण गरेका थिए ।