सामग्री खोज्नुहोस्

काठमाडौं । भिजिट भिसामा हुने अनियमितता नियन्त्रण र अध्यागमन प्रशासनमा सुशासन प्रवर्द्धन गर्न सरकारले पुराना ६ बुँदे मापदण्ड र प्रावधानहरू खारेज गर्दै नयाँ सहज व्यवस्था लागू गरेको छ।

अध्यागमन विभागका अनुसार अब भिजिट भिसामा प्रस्थान गर्न इच्छुक व्यक्तिले ६ महिना वैध राहदानी, प्रवेशाज्ञा (वा अनअराइभल देश भए प्रवेशाज्ञा नचाहिने), हवाई टिकट र स्वघोषणा पत्र पेस गरे पुग्नेछ ।

विभागले जारी विज्ञप्तिमा भनिएको छ, ‘यात्रुले आफ्नो भ्रमणका परिणामप्रति स्वयम् जिम्मेवार हुने गरी घोषणा गरेपछि प्रस्थान अनुमति दिइनेछ।’

उच्चस्तरीय अध्ययन समितिको सुझावअनुसार यो निर्णय संविधानले सुनिश्चित गरेका नागरिकका मौलिक हक र स्वतन्त्र आवागमन अधिकारको प्रत्याभूति गर्न नयाँ व्यवस्था लागू गरिएको हो ।

नयाँ व्यवस्था लागू भएसँगै विभागले नागरिकलाई कुनै बिचौलियाको प्रभावमा नपरी निर्धक्क भई यात्रा गर्न आग्रह गरेको छ।

अध्यागमन विभागले स्थानीय तह र जिल्ला प्रशासन कार्यालयहरूलाई यो सूचना सबै नागरिकसम्म पुर्‍याउन आग्रह गरेको छ।