सामग्री खोज्नुहोस्

एजेन्सी । बङ्गलादेशका वकिलहरूले मुलुकबाट पलायन भएकी पूर्वप्रधानमन्त्री शेख हसिनालाई मानवताविरुद्धको अपराधमा मृत्युदण्डको सजाय दिन अदालतमा माग पेस गरेका छन् ।

हसिनाले सन् २०२४ जुलाई–अगस्टमा विद्यार्थी नेतृत्वको विद्रोहलाई दमन गर्ने क्रममा घातक दमनको आदेश दिएको बिहीबार अभियोजन गरिएको आरोपमा भनिएको छ ।

जसका कारण झडपमा एक हजार चार सय जनाको मृत्यु भएको थियो ।

संयुक्त राष्ट्रसङ्घको प्रतिवेदनले पनि यस झडपमा ठूलो सङ्ख्यामा जनधनको क्षति भएको पुष्टि गरेको छ ।

मुख्य अभियोजक ताजुल इस्लामले अदालत बाहिर पत्रकारहरूसँग कुरा गर्दै भने, ‘हामी उहाँलाई उच्चतम सजायको माग गर्दैछौं । एकल हत्याका लागि मृत्युदण्ड नियम हो, तर एक हजार चार सय हत्याका लागि कम्तीमा एउटा मृत्युदण्डको माग उचित छ ।’​

अभियोजनका अनुसार ७८ वर्षीया हसिना यस घटनाको केन्द्रविन्दु थिइन् र जुलाई–अगस्ट विद्रोहको समयमा भएका सबै अपराधहरू उनको वरिपरि केन्द्रित थिए ।