सामग्री खोज्नुहोस्

काठमाडौं । हमासको सैन्य शाखा अल–कसम ब्रिगेडले इजरायललाई नेपाली विद्यार्थी विपिन जोशीसहित चार जनाको शव पठाउने बताएको छ ।

हमासले विज्ञप्ति जारी गर्दै उनीहरूको मृत्यु गाजामा इजरायली हवाई आक्रमणका क्रममा भएको दाबी गर्दै शव पठाउने बताएको हो । 

फिर्ता गरिने चार बन्धकका शवमा जोशी र इजरायली नागरिकहरू गाई इलोज, योसी शाराबी र ड्यानियल पेरेट्ज रहेका छन् ।

२०८० असोजदेखि हमास समूहको कब्जामा रहेका जोशीको पहिले नै मृत्यु भएको र इजरायललाई शव हस्तान्तरण गर्न लागिएको हमासले जानकारी दिएको हो ।

हमासले अन्तर्राष्ट्रिय रेड क्रसको समन्वयमा सोमबार नै शवहरू इजरायली पक्षलाई हस्तान्तरण गर्ने जनाएको छ ।

इजरायली सुरक्षा अधिकारीहरूले पनि रेड क्रसमार्फत शवहरू प्राप्त गर्ने तयारी भइरहेको पुष्टि गरेका छन्।​

हमासले यसअघि गाजामा रहेका सबै २० जना जीवित बन्धकहरूलाई मुक्त गरिसकेको भए पनि मृत इजरायली बन्धकहरूका केही शव अझै आफ्नै नियन्त्रणमा रहेको जनाएको छ ।