सामग्री खोज्नुहोस्

एजेन्सी । युक्रेनी राष्ट्रपति भोलोदिमिर जेलेन्स्कीले पुटिनलाई तत्काल रोकिएन भने रुसको आक्रमण युक्रेनबाहिर पनि फैलिने चेतावनी दिएका छन् ।

संयुक्त राष्ट्रसंघ महासभामा सम्बोधन गर्दै उनले सहयोगी मुलुकहरूलाई अझ बलियो एकता देखाउन आग्रह गर्दै विश्व ‘मानव इतिहासकै सबैभन्दा विनाशकारी हतियार दौड’मा रहेको उल्लेख गरे ।

जेलेन्स्कीले कृत्रिम बुद्धिमत्ता (एआई)सम्बन्धी अन्तर्राष्ट्रिय नियम बनाउनुपर्नेमा जोड दिँदै स्वचालित ड्रोन र मानवविहीन विमान पारम्परिक युद्धभन्दा खतरनाक हुने दाबी गरे । उनले मोल्दोभा गुम्ने खतरा र जर्जिया–बेलारुसलाई बचाउन असफल भएको प्रसंग उठाए ।

यसैबीच, मोल्दोभाकी राष्ट्रपति माइया सान्दुले क्रेमलिनलाई हिंसा भड्काउन ‘सयौं मिलियन युरो खर्च गरेको’ आरोप लगाइन् । नाटो सदस्य एस्टोनिया, पोल्यान्ड र रोमानियाले आकाशसीमा उल्लंघनको विषयमा आपत्ति जनाएका छन् ।​

जेलेन्स्कीले अमेरिकी राष्ट्रपति डोनाल्ड ट्रम्पसँग भेटलाई ‘सफल’ भन्दै अमेरिकाबाट सुरक्षा ग्यारेन्टी र थप हतियार सहयोगको अपेक्षा व्यक्त गरे।

ट्रम्पले पनि युक्रेनले आफ्नो सम्पूर्ण भूभाग फिर्ता लिन सक्ने विश्वास व्यक्त गर्दै रुसलाई ‘कागजी बाघ’ को संज्ञा दिएका बीबीसीले लेखेको छ ।