सामग्री खोज्नुहोस्

एजेन्सी । फ्रान्समा राष्ट्रपति इमानुएल माक्रोंको सरकारद्वारा प्रस्तावित बजेट कटौतीविरुद्ध सयौं प्रदर्शनकारी सडकमा उत्रिएका छन् ।

उच्च घाटा र ऋणसँग जुझिरहेको अवस्थामा सरकारले अघि सारेको आर्थिक योजनाप्रति आक्रोश देखाउँदै आन्दोलन गरिएको हो।

बिहीबार डजनौं ट्रेड यूनियनहरूले एकजुट भई हड्ताल गरे र पेरिस, लियोन, लिल र मार्सेली लगायतका ठूला शहरमा प्रदर्शन गर्दै सरकारको नीतिविरुद्ध आवाज उठाए।

गत हप्ताको अविश्वास प्रस्तावपछि प्रधानमन्त्री फ्राँस्वा बाएरूले राजीनामा दिएपछि उत्पन्न अशान्ति अझ बढेको हो । माक्रोंले नयाँ प्रधानमन्त्रीमा आफ्ना निकट सहयोगी सेबास्टियन लेकोर्नुलाई नियुक्त गरेपछि जनआक्रोश झनै चर्किएको छ।

यसअघि मात्र ‘ब्लक एभ्रिथिङ’ नामक सरकारविरोधी आन्दोलनसमेत भएको अलजजीराले जनाएको छ ।

उक्त आन्दोलनमा १ लाख ७५ हजार मानिस सहभागी भएका थिए। सयौं प्रदर्शनकारी पक्राउ परे, सडक र पेट्रोलपम्प अवरुद्ध पार्न आगजनी गरियो, बारिकेड बनाइयो, जसले रेल तथा सवारी यातायातमा व्यापक अवरोध गरेको अधिकारीहरूले बताएका छन् ।