सामग्री खोज्नुहोस्

एजेन्सी । गाजाको अपार्टमेन्ट र आवासीय भवनमा मंगलबार इजरायलले गरेको आक्रमणबाट १३ जनाको मृत्यु भएको ​गाजाको नागरिक सुरक्षा एजेन्सीले जनाएको छ ।

प्रवक्ता महमुद बासलले भने, ‘इजरायली लडाकू विमानहरूले दक्षिणपश्चिम गाजा शहरको आवासीय भवनको माथिल्लो तलामा आक्रमण गर्दा १० जनाको ज्यान गएको छ ।’

उनका अनुसार, इजरायली हेलिकप्टरहरूले शहरको पश्चिममा रहेको अपार्टमेन्टमा पनि आक्रमण गरेको र त्यहाँ तीन जनाको मृत्यु भएको छ भने अन्य धेरै घाइते भएका छन् ।

इजरायली सेनाले प्यालेस्टिनी क्षेत्रको सबैभन्दा ठूलो शहरी केन्द्र गाजा सहर कब्जा गर्ने तयारी गर्दै आक्रमण तीव्र बनाएको छ र निकासीको चेतावनी दिएको छ ।

संयुक्त राष्ट्रसङ्घको अनुमानअनुसार, गाजा शहर र वरपर करिब १० लाख मानिस बस्छन्, जहाँ अनिकाल घोषणा गरिएको छ ।

एएफपीका तथ्याङ्कअनुसार, हमासले सन् २०२३ अक्टोबरमा इजरायलमा गरेको आक्रमणमा अधिकांश सर्वसाधारण गरी एक हजार दुई सय १९ जनाको मृत्यु भएको थियो ।

हमासद्वारा सञ्चालित गाजाको स्वास्थ्य मन्त्रालयको तथ्याङ्कअनुसार, इजरायली जवाफी आक्रमणमा अधिकांश सर्वसाधारण गरी कम्तीमा ६३ हजार पाँच सय ५७ प्यालेस्टिनीको ज्यान गएको छ ।

हमासद्वारा सञ्चालित गाजाको स्वास्थ्य मन्त्रालयको तथ्याङ्कलाई संयुक्त राष्ट्रसङ्घले भरपर्दो ठानेको छ ।