सामग्री खोज्नुहोस्

एजेन्सी । विदेश भ्रमणका लागि सरकारी कोषको दुरुपयोग गरेको आरोपमा पक्राउ परेका श्रीलङ्काका पूर्वराष्ट्रपति रनिल विक्रमसिंघेलाई शनिबार सरकारी अस्पतालको सघन उपचार कक्षमा भर्ना गरिएको छ ।

कोलम्बो नेशनल हस्पिटलका उपमहानिर्देशक रुक्शान बेलानाले एएफपीसँग कुरा गर्दै शुक्रबार राति हिरासतमा पठाइएका विक्रमसिङ्घेलाई ‘डिहाइड्रेसन’को समस्या देखिएको र चिकित्सकको निगरानीमा राखेर उपचार गर्नुपर्ने देखिएकाले उनलाई सघन उपचार कक्षमा भर्ना गरिएको छ ।’

गम्भीर जटिलताबाट बच्नका लागि उनलाई चिकित्सकको निगरानीमा राखिएको उनले बताए । ‘पूर्वराष्ट्रपति विक्रमसिङ्गेलाई उच्च रक्तचापसँगै मधुमेहको समस्या पनि रहेको छ,’ उनले भने ।

विक्रमसिंघेको अहिले अवस्था स्थिर रहेको चिकित्सकले बताएका छन् ।

स्वास्थ्य अवस्था बिग्रँदै गएपछि उनलाई श्रीलङ्काको मुख्य सरकारी अस्पतालमा लगिएको कारागारका प्रवक्ताले जानकारी दिएका छन् ।

जेलमा रहेका ७६ वर्षीय विक्रमासिङ्घेलाई भेट्न पुगेका विपक्षी सांसदहरूले विक्रमसिङ्घेको स्वास्थ्य अवस्था सुधारोन्मुख रहेको बताएका छन् ।

विपक्षी दलहरूले उनी फेरि सत्तामा फर्कन सक्ने डरले सरकारले उनलाई हिरासतमा लिएको आरोप लगाएका छन्।