सामग्री खोज्नुहोस्

एजेन्सी । पाकिस्तानमा मनसुनी वर्षाका कारण बुधबार २० जनाभन्दा बढीको मृत्यु भएको जनाइएको छ । जहाँ गत हप्ता मात्र वर्षाले सिङ्गो गाउँ बगाउँदा ४०० भन्दा बढीको मृत्यु भएको थियो ।

राष्ट्रिय विपद् व्यवस्थापन प्राधिकरण (एनडिएमए) का अनुसार गिलगिट–बाल्टिस्तानको उत्तरी क्षेत्रमा ११ जना र कराचीमा १० जनाको बाढीका कारण मृत्यु भएको छ ।

मौसम विभागले शनिबार सम्म थप वर्षाको पूर्वानुमान गरेको छ भने प्रभावित सहरमा विद्यालयहरू बन्द रहेका छन् ।

सिन्ध प्रान्तका प्रमुख मौसमविद् अमिर हैदर लघारीले बाढीको प्रमुख कारण कमजोर पूर्वाधार भएको बताए ।

दुई जिल्लामा वर्षाका कारण ४० देखि ५० वटा घरहरू क्षतिग्रस्त भएको प्रान्तीय विपद् अधिकारी मुहम्मद युनसले बताए ।

गत बिहीबारदेखि अफगानिस्तानको सिमानामा रहेको पहाडी उत्तरी प्रान्त खैबर पख्तुनख्वामा ३५० जनाभन्दा बढीको मृत्यु भएको छ ।​

अधिकारीहरू तथा सेनाले पहिरो र भारी वर्षाले प्रभावित गाउँहरूमा दर्जनौं बेपत्ता व्यक्तिहरूको खोजी गरिरहेको जनाएका छन् ।

राहत शिविरहरू स्थापना गरी चिकित्सा सहायताका साथै सुक्खा रासन पनि दिइरहेका सेनाका कर्नल इरफान अफ्रिदीलाई उद्धृत गर्दै एएफपीले जनाएको छ ।

यसैबीच अधिकारीहरूले सेप्टेम्बरको मध्य सम्म मनसुनी वर्षा जारी रहने चेतावनी दिएका छन् ।

अधिकारीहरूका अनुसार यस वर्षाको सिजन शुरू भएदेखि वर्षाका कारण करिब ७५० जनाको मृत्यु भइसकेको छ ।

मनसुन बाढीले सन् २०२२ मा पाकिस्तानको एक तिहाइ भाग डुबाएको थियो, जसको परिणामस्वरूप लगभग १,७०० जनाको मृत्यु भएको थियो ।