सामग्री खोज्नुहोस्

एजेन्सी । एयर क्यानडाले आफ्ना दैनिक एक लाख ३० हजार यात्रुहरूको ग्रीष्मकालीन यात्रालाई कर्मचारीहरूको आन्दोलनका कारण पर्न गएको व्यवस्थापकीय समस्या देखाउँदै उडानहरू स्थगित गरेको छ । एयर क्यानडाले शनिबार सयौं उडानहरू रद्द भएको जानकारी दिएको छ। 

विश्वका १८० शहरमा सिधै उडान भर्ने क्यानडाको सबैभन्दा ठूलो एयरलाइन्सले एयर क्यानडा वा यसको कम लागतको सहायक कम्पनी एयर क्यानडा रुजको टिकट काटिएको भए पनि उडानहरू रद्द भएकाले सेवाका लागि अर्को सूचना नभएसम्म विमानस्थलमा नजान आग्रह गरेको छ ।

यद्यपि, यो निर्देशन तेस्रो पक्षद्वारा सञ्चालित एयर क्यानडा एक्सप्रेसको सेवा आन्दोलनका कारण प्रभावित हुने छैन।

एयर क्यानडाले जारी गरेको विज्ञप्तिमा भनिएको छ, ‘हडतालले ग्राहकमा पारेको असरप्रति एयर क्यानडा गहिरो खेद प्रकट गर्दछ ।’

एयर क्यानडाका १० हजार उडान कर्मचारी प्रतिनिधित्व गर्ने ‘क्यानेडियन युनियन अफ पब्लिक इम्प्लोइज (सीयूपीई)ले स्थानीय समयअनुसार शनिबार राति १२ः५८ बजेदेखि हडतालको औपचारिक शुरूवात भएको जनाएको छ।

यसको जवाफमा एयर क्यानडाले सीयूपीईसँग सम्बन्धित ‘चालक दलका सदस्य’ को हाजिरीकोे निरन्तरताबारे प्रश्न उठाएको छ । एयर क्यानडाले कर्मचारीहरूलाई भुक्तानी विवादको कारण गतिरोधको समयमा काम नगर्न भनेको छ ।

एयर क्यानडाले सम्भावित श्रम कार्यअघि बिस्तारै सेवा सञ्चालन बन्द गरिरहेको थियो।

शुक्रबार राति ८ बजेसम्ममा एयरलाइन्सले ६२३ उडान रद्द गरेको र एक लाखभन्दा बढी यात्रु प्रभावित भएको जनाएको छ । यसको दैनिक ७०० उडान तालिका शनिबारका लागि रद्द गरिएको छ ।