सामग्री खोज्नुहोस्

एजेन्सी । इजरायलको हवाई आक्रमणमा अलजजीराका पाँच जनासहित छ पत्रकारले ज्यान गुमाएका छन् ।​ गाजास्थित अल-शिफा अस्पतालमा इजरायलले गरेको आक्रमणमा उनीहरू मारिएका जनाइएको छ ।

संवाददाता अनस अल–शरीफ, मोहम्मद कुरैके, क्यामेरापर्सन इब्राहिम जहीर, मोआमेन अलिवा, सहयोगी मोहम्मद नौफल र स्वतन्त्र पत्रकार मोहम्मद अल खलिद मारिएका अलजजिराले जनाएको छ ।​ 

रिपोर्टर्स विथआउट बोर्डर्स (आरएसएफ)का अनुसार सोही आक्रमणमा परेर थप ३ जना पत्रकार घाइते भएका छन् ।

पत्रकार शरीफले ‘हमास’को आतंकवादी सेलको प्रमुखको रूपमा काम गरेको आरोप लगाउँदै इजरायल डिफेन्स फोर्स (आईडीएफ)ले हवाई आक्रमण गरेको स्वीकार गरेको छ । आईडीएफले टेलिग्राममा पोस्ट गर्दै भनेको छ, ‘हमासको आतंकवादी सेलका प्रमुखका रूपमा काम गरिरहेका थिए ।’ 

उनीहरू मारिएको विरोधमा विभिन्न स्थानमा प्रदर्शन र श्रद्धाञ्जली कार्यक्रम गरिएको छ । 

गाजाको सरकारी सञ्चार कार्यालयका अनुसार, २०२३ को अन्त्यतिर इजरायलको गाजामाथिको युद्ध शुरू भएदेखि हालसम्म कम्तीमा २३८ जना पत्रकार मारिएका छन् ।​