सामग्री खोज्नुहोस्

टोकियो । जापानको मौसम विज्ञान एजेन्सीले क्युसु क्षेत्र र यामागुची प्रान्तमा लगातार भइरहेको भारी वर्षाका कारण पहिरो, नदी बाढी तथा तल्लो भूभाग डुबानको उच्च जोखिम रहेको चेतावनी दिएको छ।

एजेन्सीका अनुसार, आइतबार फुकुओका र यामागुची प्रान्तमा ‘लाइनियर प्रिसिपिटेसन जोन’ (एकै ठाउँमा लगातार वर्षा गराउने भीषण वर्षा बादलको पट्टी) बनेको छ।

यसका साथै, सागा, नागासाकी, कुमामोटो, ओइता, मियाजाकी र कागोशिमा प्रान्तमा पनि सोमबार बिहानसम्म यस्तै वर्षा हुने सम्भावना रहेको चेतावनी दिइएको जापान टाइम्सले जनाएको छ ।

देशका अन्य थुप्रै भागमा पनि आइतबार त्सुसिमा जलडमरूमध्यदेखि सानिन क्षेत्र हुँदै कान्तो क्षेत्रसम्म फैलिएको स्थिर मौसमी रेखाका कारण वर्षा भएको छ।

भारी वर्षा र जोखिमका कारण फुकुओका प्रान्तको फुकुओका, किताक्युसु र मुनाकाता शहरमा, साथै यामागुची प्रान्तको यामागुची र सिमोनोसेकी शहरमा स्थानान्तरण आदेश जारी गरिएको छ।

पश्चिम जापान रेलवेले आइतबार दिउँसोदेखि हिरोशिमा र हाकाता स्टेशनबीचको सबै सान्यो शिन्कान्सेन रेल सेवा दिनभरका लागि स्थगित गरेको छ।