सामग्री खोज्नुहोस्

एजेन्सी । दक्षिण अफ्रिकाको उत्तर–पूर्वी क्षेत्रमा रहेका विभिन्न सुन खानीमा काम गरिरहेका करिब एक हजार अवैध आप्रवासी मजदुर पक्राउ परेका छन् ।

प्रहरीका अनुसार म्पुमालांगा प्रान्तको बार्बरटन गाउँ नजिकैको खानी क्षेत्रमा एक सातासम्म चलेको अपरेसनमा यी मजदुरहरू पक्राउ परेका हुन् । 

प्रहरी प्रवक्ता डोनाल्ड म्ड्लुलीले भने, ‘अझै पनि केही अवैध खानी मजदुरहरू भित्र लुकेका छन् । सतहमा निस्कनासाथ नियन्त्रणमा लिइनेछ ।’

खानी सञ्चालक कम्पनी बार्बरटन माइनसले विगतमा घाटाका कारण कर्मचारी हटाउँदा स्थानीय समुदायमा आक्रोश फैलिएको बताए ।

तर पछि भित्रै अवैध रूपमा खानी सञ्चालन हुँदै आएको थाहा भएपछि प्रहरी र सुरक्षा निकायले संयुक्त रूपमा कारबाही शुरू गरेका हुन् । ‘खानीभित्र अवैध रूपमा खाद्य र अन्य सामग्री पुर्‍याइँदै आएको थियो । यसलाई रोक्न यो अपरेसन आवश्यक थियो,’ कम्पनीले भनेको छ ।

प्रहरीले अहिलेसम्म कुनै मानवीय क्षति नभएको जनाएको छ ।

गत वर्ष जोहान्सबर्ग नजिकैको स्टिलफोन्टेन क्षेत्रमा गरिएको यस्तै कारबाहीमा ९० जना अवैध खानी मजदुरको ज्यान गएको थियो ।

यसपटक पनि प्रहरीले खानीलाई चारैतिरबाट घेराबन्दी गर्दै भित्र आपूर्ति रोक्ने रणनीति अपनाएको थियो, जसले गर्दा भित्र रहेका मजदुरहरू बाहिर आउन बाध्य भएका थिए ।