सामग्री खोज्नुहोस्

एजेन्सी । रुसको कामचटकामा विश्वको छैटौं ठूलो भूकम्प गएको छ ।

अमेरिकी भूगर्भ सर्वेक्षण (यूएसजीसी)का अनुसार, भूकम्पको तीव्रता ८.८ म्याग्निच्युड थियो । बुधबार बिहान गएको भूकम्पको केन्द्रविन्दु जमिनबाट १९.३ किलोमिटर गहिराइमा रहेको यूएसजीसीले जनाएको छ ।

यसअघि बिहान शुरूमा ८ र त्यसपछि ८.७ म्याग्निच्युडको भूकम्प भनिएको थियो । तर पछि त्यसलाई सच्याएर ८.८ म्याग्निच्युडको रहेको जानकारी दिइएको छ ।

यसलाई पछिल्लो दशकको सबैभन्दा शक्तिशाली भूकम्प भनिएको छ।

भूकम्पपछि कामचटकामा ४ मिटर अग्लो सुनामी आएको र धेरै भवनहरूमा क्षति पुगेको जनाइएको छ। जापानमा १ फिट उचाइका छालहरू आएपछि २० लाख मानिसलाई सुरक्षित स्थानमा सारिएको छ भने फुकुशिमा आणविक रिएक्टर खाली गरिएको छ।

जापान मौसम विभागले छालहरूको उचाइ अझै बढ्न सक्ने भन्दै सचेत रहन आग्रह गरेको छ। सेन्डाई अन्तर्राष्ट्रिय विमानस्थल र केही फेरी सेवा बन्द गरिएका छन्।

यस घटनापछि पेरु, इक्वेडर, गालापागोस टापु र चीनमा समेत सुनामीको चेतावनी जारी गरिएको छ। यद्यपि ती क्षेत्रहरू केन्द्रविन्दुबाट हजारौं किलोमिटर टाढा भए पनि सावधानी अपनाइएको छ।

जापानका प्रधानमन्त्री शिगेरु इशिबाले नागरिकलाई उच्च स्थानमा बस्न आग्रह गरेका छन्।