सामग्री खोज्नुहोस्

काठमाडौं । सिन्धुलीको गोलञ्जोर गाउँपालिका– ६ छेत्पाबाट सम्पर्कविहीन भएका उर्मिला हायूको परिवारका सबै सदस्य पोखरामा भेटिएका छन् ।

उनीहरू कास्कीको पोखरा महानगरपालिका- ३० गगनगौँडाका दुई घरमा बसिरहेको अवस्थामा भेटिएका प्रहरीले जनाएको छ ।​ 

उर्मिला हायूसहित अस्मिता हायू, लालबहादुर हायू, ओमकुमारी हायू, कमला हायू, ​शान्ता हायू, ​बेगबहादुर हायू, अर्जुन हायू, कोमलमाया हायू, राजु हायू, लक्की हायू, ​रियाशा हायू, उषा हायू, हिमाल हायू, सुवर्ण हायू र पूर्ण हायू सोमबार राति पोखरामा फेला परेका हुन् । 

एकै परिवारका १६ जना सदस्य बेपत्ता भएको सूचनापछि सोमबार दिनभर स्थानीय जनप्रतिनिधि, प्रहरी र स्थानीयले खोजी शुरू गरेका थिए । 

उनीहरूले साउन १० गते राति १ बजे आफ्नो थातथलो छाडेको खुलेको छ । 

इलाका प्रहरी कार्यालय, सिसुवा कास्कीका प्रमुख श्रवण विकका अनुसार उनीहरू सिन्धुली फर्किन चाहेका छैनन् । 

केटाकेटी बिरामी परिराख्ने र धामीले पनि नबस्न भनेको जनाउँदै उनीहरूले सिन्धुली फर्किन नचाहेको बताएका छन् । 

उनीहरू खनियाँखर्क–सिन्धुली–हेटौंडा–मुग्लिन हुँदै पोखरा पुगेका थिए ।