सामग्री खोज्नुहोस्

एजेन्सी । गाजामा झण्डै एकतिहाई मानिसहरू भोकै बस्न बाध्य भएको संयुक्त राष्ट्रसंघको खाद्य सहायता कार्यक्रम वर्ल्ड फूड प्रोग्राम (डब्लूएफपी)ले जनाएको छ ।

साथै डब्लूएफपीले उक्त क्षेत्रमा कुपोषण बढ्दो र भयावह अवस्थामा रहेको जनाएको छ । ‘कुपोषण भयावह रूपमा बढ्दो छ, झण्डै ९० हजार महिला तथा बालबालिका तत्काल उपचारको खाँचोमा छन्’, डब्लूएफपीले जारी गरेको विज्ञप्तिमा उल्लेख गरिएको छ।​

गाजामा भोकमरीको जोखिमबारे चेतावनीहरू पछिल्ला दिनहरूमा झन् गम्भीर बनेका छन् । गाजाको हमास-नियन्त्रित स्वास्थ्य मन्त्रालयका अनुसार, शुक्रबार थप ९ जनाको कुपोषणका कारण मृत्यु भएको छ। योसँगै युद्ध शुरू भएयता कुपोषणबाट ज्यान गुमाउनेको संख्या १२२ पुगेको छ।​

इजरायलले भने गाजामा राहत सामग्री पठाउन कुनै रोक नलगाइएको दाबी गर्दै आएको छ । त्यसले भोकमरीको जिम्मेवारी हमासलाई दिएको छ। इजरायली सुरक्षा अधिकारीले शुक्रबार जानकारी दिँदै निकट भविष्यमा हवाईमार्फत खाद्यान्न पठाउन अनुमति दिन सकिने संकेत दिएका छन्।

तर सहायता संस्थाहरूले हवाईमार्फत राहत पुर्‍याउने तरिका प्रभावकारी नहुने बताउँदै आएका छन् । यद्यपि, संयुक्त अरब इमिरेट्स (यूएई) र जोर्डनले खाद्यान्न हवाईमार्फत पुर्‍याउने तयारी गरेको स्थानीय सञ्चारमाध्यमले जनाएका बीबीसीले लेखेको छ ।

तर बीबीसीलाई जोर्डनका एक वरिष्ठ अधिकारीले जानकारी दिँदै इजरायली अनुमति अझै प्राप्त नभएको बताएका छन् ।​

यसबीच, संयुक्त राष्ट्रसंघले यस्तो राहत रणनीतिलाई ‘इजरायली सरकारको निष्क्रियतालाई ढाकछोप दिने उपाय’ भन्दै आलोचना गरेको छ।