सामग्री खोज्नुहोस्

एजेन्सी । न्यूयोर्कस्थित प्रतिष्ठित कोलम्बिया विश्वविद्यालयले यहुदी विद्यार्थीहरूको संरक्षण गर्न असफल भएको आरोपमा राष्ट्रपति डोनाल्ड ट्रम्पको प्रशासनसँग २०० मिलियन डलर तिर्ने सहमति गरेको छ। विश्वविद्यालयले यो रकम तीन वर्षभित्र अमेरिकी संघीय सरकारलाई बुझाउनेछ।

यो सहमति कोलम्बिया विश्वविद्यालय र संघीय सरकारले संयुक्त रूपमा सार्वजनिक गरेका हुन्। यसबापत अमेरिकी सरकारले मार्चमा रोकिएको वा कटौती गरिएको ४०० मिलियन डलर बराबरको अनुदानमध्ये केही पुनः उपलब्ध गराउने भएको छ।

गत वर्ष इजरायल-गाजा युद्धको सन्दर्भमा कोलम्बियाको क्याम्पसमा भएको प्रदर्शन र त्यसपछिको यहुदी विरोधका घटनाले विश्वविद्यालय विवादमा तानिएको थियो। ट्रम्प प्रशासनले यस्तो घटनामा पहिलोपटक विश्वविद्यालयलाई प्रत्यक्ष रूपमा जिम्मेवार बनाउँदै कारबाही गरेको थियो।

शिक्षा मन्त्री लिन्डा म्याक्मोहनले यो सहमतिलाई ‘विश्वविद्यालयहरूलाई उत्तरदायी बनाउने दिशामा ऐतिहासिक मोड’ भनेकी बीबीसीले जनाएको छ ।

कोलम्बियाकी कार्यवाहक अध्यक्ष क्लेयर शिपम्यानले ‘संघीय छानबिन र अन्योलपूर्ण अवस्थाबाट अघि बढ्न यो सम्झौता महत्त्वपूर्ण कदम हो’ भन्ने प्रतिक्रिया दिएकी छन्।