सामग्री खोज्नुहोस्

एजेन्सी । कोलम्बियाको उत्तरपश्चिमी क्षेत्रमा रहेको एक अवैध सुन खानीमा फसेका १८ जना मजदुरको सफलतापूर्वक उद्धार गरिएको छ ।

राष्ट्रिय खानी निकायका अनुसार १२ घण्टासम्म सञ्चालन गरिएको आपत्कालीन उद्धार कार्यपछि सबै मजदुरलाई सकुशल बाहिर निकालिएको हो ।

ती मजदुरहरू झण्डै १८ घण्टासम्म खानीभित्र फसेका थिए । उद्धारपछि उनीहरू नीलो पोशाक र पहेँलो सुरक्षात्मक हेल्मेटमा एक/एक गर्दै बाहिर निस्कँदा, माथिल्लो भागमा प्रतिक्षारत सहकर्मीहरूले उनीहरूलाई आत्मीय स्वागत गरेका थिए । टेलिभिजन फुटेजमा मजदुरहरूलाई ऊर्जा पेय प्रदान गरिएको देखिएको छ ।

दुर्घटना एन्तिओकिया प्रान्तको रेमेडियोस नगरस्थित खानीमा भएको हो । प्रारम्भिक अनुसन्धान अनुसार, पहिरोबाट जोगाउन बनाइएको संरचना बिग्रिएर खानीको मुख्य मार्ग अवरुद्ध भएपछि मजदुरहरू भित्र फसेका थिए । घटनास्थलमा उद्धारकर्मीहरू टर्चको सहायताले खोजीमा संलग्न रहेका दृश्यहरू राष्ट्रिय खानी निकायले सार्वजनिक गरेको छ ।​

रेमेडियोस क्षेत्र खानीजन्य कार्यका लागि परिचित मानिन्छ । यहाँ उत्खनन गरिएको सुन केही सशस्त्र समूह आर्थिक स्रोतका रूपमा समेत प्रयोग हुने गरेको छ । उक्त समूह लागुऔषध कारोबारमा संलग्न रहेको बताइन्छ ।

कोलम्बियामा खानी दुर्घटना बारम्बार हुने गरेका छन् ।