सामग्री खोज्नुहोस्

एजेन्सी । गाजाको नागरिक सुरक्षा निकायका अनुसार आइतबार गरिएको इजरायली हवाई आक्रमणमा कम्तीमा ४३ जना प्यालेस्टिनी नागरिकको मृत्यु भएको छ। आक्रमण बजार, पानी वितरण केन्द्र तथा शरणार्थी शिविरमा लक्षित गरिएको थियो।

नुसेरात शिविरमा पानीको धारा नजिक ड्रोन आक्रमणमा आठ बालबालिकासहित १० जनाको, गाजा सिटीको बजारमा ११ जनाको र सागरकिनारको पालमाथि तीन जनाको ज्यान गएको जनाइएको छ।

स्थानीयहरूले बिहानै ठूलो विस्फोटले घर ध्वस्त भएको र बालबालिका भग्नावशेषमा पुरिएको बताएका छन्।

युद्धविराम वार्ता अड्कियो

कतारको दोहामा एक सातादेखि चलिरहेको युद्धविराम वार्ता अड्किएको छ। दुवै पक्षले वार्ता अवरुद्ध गराएको आरोप एकअर्कामाथि लगाएका छन्।

हमासले इजरायली सेना पूर्ण फिर्ती माग गरेका छन् भने इजरायलले ४० प्रतिशत गाजा क्षेत्रमा सेना राख्ने योजना प्रस्तुत गरेको स्रोतले जनाएका छन्।

गाजा स्वास्थ्य मन्त्रालयका अनुसार सन् २०२३ यता इजरायली आक्रमणमा ५८ हजारभन्दा बढी प्यालेस्टिनी मारिएका छन्। युद्ध अन्त्य अझै अनिश्चित छ।