सामग्री खोज्नुहोस्

काठमाडौं । रसुवामा बाढीले ठूलो क्षति पुर्‍याएको छ। असार २४ गते राति ८ बजेसम्मको अद्यावधिक विवरणअनुसार १९ जना व्यक्तिहरू बेपत्ता भएका छन्।

बेपत्तामध्ये २ जना प्रहरी, ६ जना चिनियाँ नागरिक र ११ जना सर्वसाधारण छन् । उद्धार टोलीले हालसम्म ५७ जनाको सकुशल उद्धार गरेको छ भने ९ जनाको शव फेला परेको छ।

बाढी प्रभावित क्षेत्रहरूमा गोसाइँकुण्ड गाउँपालिका (वडा नं. १, २, ३), आमाछोदिङमो (वडा नं. १, ४, ५), उत्तरगया (वडा नं. २, ४, ५) र कालिका गाउँपालिकाको नाम उल्लेख गरिएको छ।

ठूलो भौतिक संरचना क्षति

बाढीका कारण नेपाल-चीन सीमा जोड्ने नाका पूर्ण रूपमा बन्द भएको छ।

प्रमुख संरचनात्मक क्षति यसप्रकार छ:

• कन्टेनर डब्बा लोड गाडी २८ वटा बगाएको
• ईभी चार्जिङ स्टेसन पूर्ण रूपमा बगाएको
• ६ वटा सानो ट्रक बगाएको
• ३५ वटा ईभी गाडी बगाएको
• तिमुरे कास्टम, सुरक्षा चौकी भवनमा क्षति
• रसुवागढी हाईड्रोपावरको संरचनामा समेत क्षति

घटनास्थलमा ३८३ जना प्रहरी परिचालन गरिएको छ भने उद्धार कार्य तीव्र पारिएको छ। गोसाइँकुण्ड गाउँपालिका–५ पाङसाङलाङ सडक–पैदलमार्ग जोखिमयुक्त रहेकाले गस्ती तथा उद्धार कार्यमा विशेष सावधानी अपनाइएको छ।

सरकार र सुरक्षाकर्मीले प्रभावित क्षेत्रमा तत्काल राहत, उद्धार तथा पूर्वाधार मर्मत कार्य सञ्चालन गरिरहेको जनाइएको छ।