सामग्री खोज्नुहोस्

टोकियो । टोकियोको तोसिमा वार्ड अन्तर्गत इकेबुकुरो क्षेत्रमा रहेको चर्चित सनसाइन सिटी सपिङ कम्प्लेक्समा एक कर्मचारीमाथि छुरा प्रहार भएको छ।

मंगलबार बिहानको घटनापश्चात् एक युवकलाई पक्राउ गरिएको जापानी सार्वजनिक प्रसारक एनएचकेले प्रहरी स्रोतलाई उद्धृत गर्दै जनाएको छ।

प्रहरीका अनुसार बिहान करिब ११:५० बजे सनसाइन सिटीबाट ‘कर्मचारीमाथि छुरा प्रहार भएको’ भनी आपतकालीन फोन आएको थियो।

आरोपित पुरुषले धारिलो हतियार देखाउँदै एक पुरुष कर्मचारीमाथि आक्रमण गरेका थिए। पीडित गम्भीर घाइते अवस्थामा अवचेतन रहेको जनाइएको छ।

घटनापछि केही समयमै आरोपित व्यक्ति आफैं चक्कु हातमै बोकी नजिकैको प्रहरी बिटमा आत्मसमर्पण गरेका थिए।

टोकियो मेट्रोपोलिटन प्रहरी विभागले तत्कालै उनलाई आपतकालीन रूपमा पक्राउ गरेको र अहिले घटनाको विस्तृत अनुसन्धान भइरहेको जनाएको छ।