सामग्री खोज्नुहोस्

एजेन्सी । इरानको आक्रमणबाट अहिलेसम्म २ हजार ८३५ जना इजरायली नागरिक अस्पताल भर्ना भएका छन् । तीमध्ये २३ जना गम्भीर घाइते, १०७ जना मध्यम, २ हजार ५५५ जना सामान्य घाइते र ११९ जना मानसिक तनावमा परेका छन् ।

इरानले आइतबार बिहान पुनः आक्रमण गरेपछि इजरायलको स्वास्थ्य मन्त्रालयले ८६ जना नागरिकलाई एकैपटक अस्पताल भर्ना गरिएको जनाएको छ ।

स्वास्थ्य मन्त्रालयको विवरणअनुसार, दुई जनाको अवस्था गम्भीर छ भने ७७ जनालाई सामान्य चोट लागेको छ ।

चार जना मानसिक तनाव (आतङ्क)का कारण अस्पताल भर्ना भएका छन् भने तीन जनाको अवस्था अझै मूल्याङ्कन भइरहेको छ ।

यसअघि जुन १३ मा इजरायलले इरानमाथि सैन्य कारबाही थालेको थियो । त्यसको जवाफस्वरूप इरानले इजरायलमाथि लगातार मिसाइल आक्रमण गरिरहेको छ ।

त्यस्तै आइतबार बिहान इरानले तेल अभिभको एउटा आवासीय बस्तीमा आक्रमण गर्दा करिब २० जना सामान्य घाइते भएका छन् । 

उक्त क्षेत्र विद्यालय र एक ठूलो किनमेल केन्द्र (शपिङ मल) नजिकै रहेको प्रहरीले जानकारी दिएको छ । ‘केही मिसाइलहरू आवासीय भवनमा खसेका छन् । हामी अझै भग्नावशेषमा मिसाइलका टुक्राहरू खोजिरहेका छौं र सम्भावित रूपले फसेका मानिसहरूलाई उद्धार गरिरहेका छौं,’ इजरायली प्रहरीका अन्तर्राष्ट्रिय प्रवक्ता डीन एल्सडनको भनाइ उद्धृत गर्दै सीएनएनले लेखेको छ ।

तेल अभिभको रमात अविभ क्षेत्रमा भएको आक्रमणपछि त्यहाँको स्थिति अझै तनावपूर्ण छ । सुरक्षाकर्मीहरू सम्भावित थप आक्रमणको आशंकामा सतर्क रहन आग्रह गरिरहेका छन् ।

इजरायल–इरान तनावले मध्यपूर्वमा परिस्थितिलाई गम्भीर बनाउँदै लगेको छ, जसको असर नागरिक जीवनमा प्रत्यक्ष देखिन थालेको छ ।