सामग्री खोज्नुहोस्

काठमाडौं । स्कटल्यान्डविरुद्ध कीर्तिमानी जीत नजिक पुगेर नेपाल अन्ततः पराजित बनेको छ । 

आईसीसी क्रिकेट विश्वकप लिग–२ अन्तर्गत एकदिवसीय क्रिकेट शृंखलामा ​आइतबार राति भएको खेलमा नेपाल २ रनले पराजित बनेको हो ।​

स्कटल्यान्डको डुन्डेस्थित फोर्टहिल क्रिकेट मैदानमा स्कटल्यान्डले दिएको ३२४ रनको विशाल लक्ष्य पच्छ्याएको नेपालले ५० ओभरमा सबै विकेट गुमाएर ३२१ रन मात्रै बनायो ।

​यसअघि स्कटल्यान्डले निर्धारित ५० ओभरमा ६ विकेटको क्षतिमा ३२३ रन बनाएको थियो ।

स्कटल्यान्डका लागि कप्तान रिची बेरिङ्टनले शतकीय इनिङ खेलेका थिए । उनले बेरिङ्टनले ११४ बलमा छ चौका र चार छक्काको सहयोगमा १०२ रनको शतकीय पारि खेले ।

चार्ली टेयरले ६५ बलमा नौ चौकाको सहयोगमा ६८ रन जोडे । त्यसैगरी, मार्क वाटले अविजित २१ र फिनले म्याकक्रियाथले १७ रन बनाए ।

नेपालका लागि करण केसी र दीपेन्द्रसिंह ऐरीले समान २/२ विकेट लिए भने ललितनारायण राजवंशीले एक विकेट लिए ।