सामग्री खोज्नुहोस्

काठमाडौं । नेपाल सरकारद्वारा आयोजित पहिलो ‘सगरमाथा संवाद’ २५ बुँदे ‘सगरमाथा कार्य आह्वान’ जारी गर्दै सम्पन्न भएको छ। ‘जलवायु परिवर्तन, हिमाल र मानवजातिको भविष्य’ विषयमा जेठ २–४ मा भएको संवादले हिमाली मुद्दालाई अन्तर्राष्ट्रियकरण गर्न सफल भएको छ।

संवादले जलवायु वित्तमा समान पहुँच, हिमाली पारिस्थितिकी संरक्षण र जलवायुजन्य हानिनोक्सानीको क्षतिपूर्तिका लागि सामूहिक प्रयासलाई जोड दिएको छ। प्रधानमन्त्री केपी शर्मा ओलीले ‘संवादको शक्ति’ मार्फत चुनौती सम्बोधन गर्नुपर्ने बताए। परराष्ट्रमन्त्री डा. आरजु राणा देउवाले हिमालदेखि टापुसम्मका आवाज जोडिएको उल्लेख गरिन्।

३६ देशका ३५० प्रतिनिधि सहभागी संवादमा १२ समानान्तर सत्र र हिन्दु कुश हिमालय क्षेत्रको मन्त्रीस्तरीय बैठक सम्पन्न भयो।

जलवायु संकट, दिगो अर्थतन्त्र र क्षेत्रीय साझेदारीमा छलफल भएको संवादले नेपालको संरक्षण प्रयासलाई विश्वमाझ उजागर गर्‍यो। सरकारले यी मुद्दालाई ताजकिस्तान, कोप–३० र संयुक्त राष्ट्र महासभामा उठाउने जनाएको छ। सन् २०२७ मा दोस्रो संवाद हुने घोषणा गरिएको छ।