सामग्री खोज्नुहोस्

एजेन्सी । अमेरिकी राष्ट्रपति डोनाल्ड ट्रम्पले मंगलबार खाडी क्षेत्रको भ्रमण हुरू गर्दै सिरियामाथिको लामो समयदेखिको अमेरिकी प्रतिबन्ध हटाउने घोषणा गरेका छन् । साथै, साउदी अरबले अमेरिकामा ६०० अर्ब डलर लगानी गर्ने प्रतिबद्धता जनाएको छ।

ह्वाइट हाउसका अनुसार, अमेरिकाले साउदी अरबलाई झन्डै १४२ अर्ब डलरको हतियार प्याकेज बिक्री गर्न सहमत भएको छ, जुन वासिङ्टनले गरेको अहिलेसम्मकै ठूलो ‘रक्षा सहयोग सम्झौता’ हो।

सिरियामाथिको प्रतिबन्ध हट्नु दशकभन्दा लामो गृहयुद्धले ध्वस्त भएको यो मुलुकका लागि ठूलो राहत हुनेछ। गत डिसेम्बरमा विद्रोही नेता तथा वर्तमान राष्ट्रपति अहमद अल-शराले राष्ट्रपति बशर अल-असदलाई सत्ताच्युत गरेका थिए।​

रियादमा आयोजित लगानी मञ्चमा बोल्दै ट्रम्पले साउदी अरबका वास्तविक शासक युवराज मोहम्मद बिन सलमानको अनुरोधमा प्रतिबन्ध हटाउने निर्णय गरेको बताए। ‘म युवराजका लागि के गर्दिनँ र’, ट्रम्पले हाँस्दै भने । जसले दर्शकहरूको हाँसो बटुलेको थियो। उनले प्रतिबन्धले महत्त्वपूर्ण भूमिका निर्वाह गरेको तर अब सिरियालाई अगाडि बढ्ने समय आएको बताए ।

यो भ्रमण सम्झौता-केन्द्रित रहेको छ र यसले कूटनीतिक गतिविधिहरूको पनि लहर ल्याएको छ।