सामग्री खोज्नुहोस्

एजेन्सी । भारतीय क्रिकेटर विराट कोहलीले टेस्ट क्रिकेटबाट तत्काल सन्न्यास लिएको घोषणा गरेका छन्। इन्स्टाग्राममार्फत कोहलीले यो निर्णय सार्वजनिक गर्दै १४ वर्षे टेस्ट यात्रालाई भावुक रूपमा सम्झेका छन्।

सन् २०११ मा टेस्ट क्रिकेटमा डेब्यु गरेका कोहलीले १२३ खेलमा ९२३० रन बनाएका छन्। उनका नाममा ३० शतक र ३१ अर्धशतक छन् भने उच्चतम स्कोर २५४ नटआउट हो। पछिल्लो समय प्रदर्शनमा आएको गिरावटले सन्न्यासको निर्णयमा भूमिका खेलेको अनुमान गरिएको छ।

कोहली भारतका सबैभन्दा सफल टेस्ट कप्तान पनि हुन्, जसले कप्तानीमा ६८ खेलमध्ये ४० जित निकाले।
उनको औसत प्रदर्शन सन् २०११–२०१९ मा ५५ को आसपास रहे पनि पछिल्लो दुई वर्षमा घटेर ३२.५६ पुगेको थियो।

उनको अन्तिम टेस्ट खेल सन् २०२५ को जनवरीमा अस्ट्रेलियाविरुद्ध सिड्नीमा भएको थियो। पाँच टेस्टको शृङ्खलामा कोहलीले आठ पारीमा केवल ९० रन बनाउन सके।

कोहली ‘फ्याब फोर’ भनिने विश्वका चार महान समकालीन टेस्ट ब्याट्सम्यानमध्ये एक हुन्— स्टिभ स्मिथ, केन विलियम्सन र जो रुटसँगै।

उनी ‘किङ्ग कोहली’ उपनामले परिचित थिए र तीनवटै अन्तर्राष्ट्रिय ढाँचामा भारतको प्रमुख ब्याट्सम्यान रहँदै आएका थिए।

यसअघि उनले टि–२० बाट पनि सन् २०२४ को अन्त्यमा बिदा लिएका थिए ।