सामग्री खोज्नुहोस्

एजेन्सी । अष्ट्रेलियाका प्रधानमन्त्री एन्थोनी अल्बानिजले बहुमतसहितको शानदार जित निकाल्दै प्रधानमन्त्रीमा पुनः निर्वाचित भएका छन्। यससँगै उनले सत्ता कायम राख्न हमेसा कठिन मानिने ‘सत्तारूढको श्राप’लाई तोडेका छन्।

औपचारिक मतगणना अझै बाँकी भए पनि प्रारम्भिक नतिजाले अल्बानिज नेतृत्वको केन्द्र–बामपन्थी लेबर पार्टीले आफ्नो बहुमत थप बलियो बनाउने देखिएको छ। अर्कोतर्फ, विपक्षी कन्जर्भेटिभ लिबरल–नेसनल गठबन्धनले देशव्यापी रुपमा लज्जास्पद हार व्यहोरेको छ।

विजयपछि सम्बोधन गर्दै अल्बानिजले भने, ‘आज अष्ट्रेलियाली जनताले निष्पक्षता, आकांक्षा र सबैका लागि अवसर, कठिनाइमा साहस देखाउने शक्ति र आवश्यक परेका व्यक्तिप्रति दयालु हुने अष्ट्रेलियाली मूल्यमा मतदान गरेका छन्।’​

यसचोटि विपक्षी गठबन्धनका नेता पिटर डटनले आफ्नो २४ वर्ष पुरानो निर्वाचन क्षेत्रसमेत गुमाएका छन्। पराजय स्वीकार गर्दै उनले भने, ‘पार्टीको हारको सम्पूर्ण जिम्मेवारी म लिन्छु र आफ्ना सांसदहरूसँग माफी माग्छु।’

यो विजयसँगै अल्बानिजले जनताको विश्वास जित्दै आफ्नो दोस्रो कार्यकाल शुरू गर्न लागेका हुन्। विश्लेषकहरूका अनुसार यो चुनाव परिणामले अष्ट्रेलियाली राजनीति नयाँ दिशातर्फ लान सक्ने संकेत देखिएको छ।