सामग्री खोज्नुहोस्

काठमाडौं । भारतको भुवनेश्वरस्थित कलिंगा इन्स्टिच्युट अफ इन्डस्ट्रियल टेक्नोलोजी​ (केआईआईटी) विश्वविद्यालयमा अध्ययनरत वीरगञ्जकी प्रिसा साहको मृत्यु भएको छ ।

उनी बिहीबार आफ्नै कोठामा मृत भेटिएकी थिइन् । उक्त घटनाको छानबिनका निम्ति कूटनीतिक पहल प्रारम्भ भएको परराष्ट्र मन्त्रालयले जनाएको छ ।

यसैबीच भारतका विदेश मन्त्रालयले साहको मृत्युप्रति दुःख व्यक्त गर्दै शोकसन्तप्त परिवारजनमा समवेदना प्रकट गरेको छ ।

मन्त्रालयले सामाजिक सञ्जालमार्फत उक्त दुःखद घटनाबारे जानकारी प्राप्त भएदेखि ओडिशा राज्य सरकारसँग निरन्तर सम्पर्कमा रहेको जनाएको छ ।

ओडिशा राज्य सरकारले मृतकको परिवारलाई पूर्ण सहयोग प्रदान गर्ने र ओडिशा प्रहरीले हाल यस घटनाको विस्तृत अनुसन्धान गरिरहेको जनाएको छ ।

भारत सरकारले सबै अन्तर्राष्ट्रिय विद्यार्थीहरूको सकुशलता, सुरक्षा र हितलाई निकै गम्भीरताका साथ लिएको जनाएको छ । ‘हामी यस विषयबारे तत्कालै सूचना आदानप्रदान तथा समन्वयलाई सुनिश्चित गर्न नेपाली अधिकारीहरू, ओडिशा राज्य सरकार साथै केआईआइटी व्यवस्थापनसँग निरन्तर सम्पर्कमा छौं,’ विदेश मन्त्रालयको विज्ञप्तिमा उल्लेख छ ।

यसअघि गत फागुनमा सोही कलेजमा रुपन्देहीको भैरहवाकी २१ वर्षीय प्रकृति लम्साल मृत भेटिएकी थिइन् ।