सामग्री खोज्नुहोस्

काठमाडौं  । काठमाडौंको तीनकुनेमा भएको हिंसात्मक प्रदर्शनपछि फरार रहेका मेडिकल व्यवसायी दुर्गा प्रसाईं पक्राउ परेका छन् ।

तीनकुने हिंसात्मक प्रदर्शनका कमान्डर प्रसाईंमाथि अनुसन्धान गर्न अदालतले प्रहरीलाई १२ दिनको म्याद दिएको छ।

झापाको भद्रपुरबाट पक्राउ परेका प्रसाईंलाई काठमाडौं ल्याएर जिल्ला अदालतमा पेस गरिएको थियो। न्यायाधीश शिशिरराज ढकालको इजलासले उनलाई अनुसन्धानको लागि १२ दिनसम्म प्रहरी हिरासतमा राख्न अनुमति दिएको हो। ​

प्रसाईंसँगै उनका सुरक्षासहयोगी दीपक खड्कालाई पनि सोही अवधि हिरासतमा राख्न अदालतले अनुमति दिएको अदालतका सूचना अधिकारी दीपककुमार श्रेष्ठले जानकारी दिए।

चैत १५ गते काठमाडौंको तीनकुनेमा पूर्वराजाका समर्थकहरूले गरेको प्रदर्शन हिंसात्मक बनेको थियो। सोही घटनामा संलग्न रही ‘राज्यविरुद्ध र सङ्गठित अपराधसम्बन्धी कसुर’ गरेको अभियोगमा प्रसाईंलाई पक्राउ गरिएको प्रहरीले जनाएको छ।

उक्त प्रकरणमा राप्रपाका नेताहरू रवीन्द्र मिश्र र डा. धवलशम्शेर जबरा पनि अनुसन्धानका लागि प्रहरी हिरासतमा रहेका छन्। घटनालाई लिएर अनुसन्धान अझै जारी छ।